Prezident Yanında QHT-lərə Dövlət Dəstəyi Şurasının üzvü Anar Xəlilov Modern.az-ın suallarını cavablandırıb.
- Anar müəllim, 3-cü sektorun Qarabağla bağlı fəaliyyəti sizi qane edirmi?
- Ümumən götürsək ,tam olmasa da qane edir. Amma daha çox işlər görülməli və bu istiqamətdə fəaliyyət göstərən QHT-lər məsuliyyətlərini dərk etməlidir. Bu gün bu istiqamətdə fəaliyyət göstərən artıq ixtisaslaşmış vətəndaş cəmiyyəti qurumları varr. Dövlətin də bu istiqamətə çox ciddi və dəyərli dəstəyi var.
Prezident Yanında QHT-lərəDövlət Dəstəyi Şurası, Prezident Yanında Gənclər Fondu, nazirliklər və s. dövlət qurumları bu istiqamətə çox ciddi dəstək verirlər. Bundan bəhrələnən və ortaya ciddi işlər qoyan QHT-lər də var, bundan öz məqsədləri üçün istifadə edib plagiatlıqla məşğul olan bəzi birliklər də. Lakin artıq zaman keçdikcə hesab edirəm ki, peşəkar QHT-lər bu istiqamətdə öz sözlərin deyir. Qarabağ ümummilli məsələdir, burada kiməsə demək olmaz ki, sən bununla məşğul olma. Amma hesab edirəm bu istiqamət üzrə QHT-lərə dəstək verən qurumlar daha diqqətli olmalı və QHT-lərin bu sahədə təcrübəsinin olub olmamasını ciddi yoxlamalıdır. 3-cü sektor bu sahədə daha çox xarici auditoriyaya uyğun layihələrə üstünlük verməlidirlər. Xüsusən də internet resurslarından geniş istifadə olunmalıdır. Bu günə kimi yaradılan saytlarımıza baxsaq barmaqla sayıla bilən saytlar qalıb ki, fəaliyyət göstərir. Əksər saytlar yenilənmir, təkrarçılıqla, plagiatlıqla məşğuldur və ya nəzarətsiz buraxılır. Buna yol vermək olmaz. Bu məsələlərlə bağlı Prezident Yanında QHT-lərəDövlət Dəstəyi Şurasının sədri, millət vəkili Azay Quliyev qarşıya konkret vəzifələr qoyub. Biz cənab Prezidentin Qarabağla bağlı gördüyü işləri yüksək qiymətləndirirk və hər birimiz üzərimizə düşən yükü götürməyə borcluyuq.
- Qarabağ məsələsini dünyaya çatdırmaq üçün hansı addımların atılmasını istərdiniz?
- Qarabağ məsələsinin dünyaya çatdırılmasında ilk olaraq təbii ki, dövlətimiz özü daha çox işlər görür. Prezident İlham Əliyevin bu məsələdə apardığı prinsipial və qətiyyətli siyasət çox uğurludur və hesab edirəm ki, müsbət nəticələrini də cəmiyyət görür. Vətəndaş cəmiyyəti də bu siyasətə uyğun olaraq fəaldır və fəaliyyət göstərir. Xaricdə təhsil alan tələbələrimiz, diasporamız, səfirliklərimiz bu sahədə ildən-ilə səylərini artırırlar. İnternet KİV-ləri inkişaf edir, ixtisaslaşmış QHT-larının sayı artır. Düzdür, hələ də biz bu sahədə istədiyimiz nəticələri əldə etməsək də amma uğurlarımız var. Nəzərə almaq lazımdır ki, yüz illərlə Beynəlxalq aləmdə artıq formalaşmış erməni lobbisinə qarşı biz cəmi 25 ildir ki, fəaliyyət göstəririk. Digər məsələlər də var, məsələn dünyanın aparıcı ölkələrinin çoxunun xristian dövlətləri olması faktı. Bunu da nəzərə almaq lazımdır ki, bəzən bizim haqq səsimiz onlar tərəfindən ikili siyasətə uyğun olaraq qəsdən eşidilmir. Bu isə bizim yaxşı fəaliyyət göstərməməyimiz anlamına gəlməməlidir. Ancaq hesab edirəm ki, biz qətiyyətli olmalıyıq, ədalət həmişə zəfər çalır.
- Azərbaycanda QHT-lərin yerini harada görürsünüz?
- Azərbaycanda vətəndaş cəmiyyətinin qurulmasında QHT-nın rolu danılmazdır. Cəmiyyətin ictimai siyasi aktiv olmasında da QHT-in böyük əməyi var. Eyni zamanda, sosial problemlərin həlli istiqamətində məsələlərin qabardılması, onun həll olunmasında QHT-lər böyük işlər görürlər. Bir sözlə, elə bir sahə yoxdur ki, bu gün orada QHT fəal olmasın. Güclü dövlət olmağımız üçün vətəndaş cəmiyyətimiz də güclü olmalıdır ki, bunun üçün də QHT-lər böyük rola malikdir. Əsasən KİV dördüncü hakimiyyət adlandırırlar hesab edirəm ki, artıq QHT-nin də adı paralel çəkilməlidir.
- QHT-lərin fəaliyyətində razı olduğunuz və narazı olduğunuz məqamlar hansılardı?
- Razı olduğum tərəflər çoxdur. Xüsusən də bu sahədə çalışan fədakar insanları qeyd etməliyəm. Məhdud maliyyə ilə illərlə ömrünü bu işə sərf edən Azərbaycanda vətəndaş cəmiyyətinin qurulmasında xidmətləri olan ziyalı QHT nümayəndələrimiz alqışlanmalıdır. Narazı olduğum tərəf isə bu gün təsadüfən bu sahəyə düşən QHT nümayəndələrinin çoxluq təşkil etməsidir . Bəzən bu insanların fəaliyyəti digər vicdanlı QHT nümayəndələrinin, eləcədə vətəndaş cəmiyyətinin adına xələl gətirir.
Pul qazanmaq xətrinə xarici qüvvələrin təsirinə düşərək dövlətə qarşı fəaliyyət göstərən QHT nümayəndələri də çox təəssüf ki, var. Bu insanlara qarşı daim sərt mövqeydəyəm, çünki onlar xalqımızın düşmənidir.
- QHT Şurasının gələcək planlarından məlumat verə bilərsiniz?
- Şura üzvü olaraq onu deyə bilərəm ki, bu günə qədər vətəndaş cəmiyyətinin inkişafına verdiyi töhvə əvəzolunmazdır və mən bunu müsbət qiymətləndirirəm. Cənab Prezident İlham Əliyevin apardığı uğurlu siyasətə uyğun olaraq Şura öz fəaliyyətini qurub və bundan sonra da fəaliyyət bu istiqamətdə olacaq.
Qafar Ağayev
