Azərbaycan güləşçisi - 53 kiloqram çəki dərəcəsində sərbəst güləş yarışlarında ölkəmizi Braziliyanın Rio-de-Janeyro şəhərində keçirilən Yay Olimpiya Oyunlarında təmsil edən Natalya Sinişin bürünc medal uğrunda təsəlliverici görüşlərdə mübarizə aparmaq hüququ qazanıb.

Yarışların 1/8 final mərhələsində N.Sinişin üçqat Olimpiya çempionu yapon güləşçisi Saori Yosidaya 0:4 hesabı ilə məğlub olmuşdu. Modern.az saytı xəbər verir ki, Trend-in məlumatına görə, S.Yosidanın finala vəsiqə qəzanması həmyerlimizi bürünc medal uğrunda mübarizəyə qoşulmasına imkan  verib.

N.Sinişin növbəti görüşdə Seneqal güləşçisi İzabel Sambu ilə mübarizə aparacaq.

Qeyd edək ki, 5-21 avqust tarixlərində Braziliyanın Rio-de-Janeyro şəhərində XXXI Yay Olimpiya Oyunları keçirilir. Azərbaycan oyunlarda 56 idmançı ilə 17 idman növündə təmsil olunur.

Müstəqil Azərbaycan üçün Rio Olimpiadası sayca 7-ci Yay Olimpiya Oyunlarıdır. Azərbaycan Olimpiya hərəkatı tarixində ilk dəfə rekord sayda - 56 idmançı ilə təmsil olunur. Buna gədər Azərbaycanın rekord göstəricisi London Olimpiadasında qeydə alınmışdı - 53 idmançı. Bundan başqa, Azərbaycan Rio-de-Janeyro Olimpiadasında ilk dəfə 4 idman növü - kamandan oxatma, kanoe slalom, trek velosipedi və triatlon üzrə təmsil olunur.

Azərbaycanı Rio Olimpiadasında 7 hakim də təmsil edir - Aydın Ağaəliyev (gimnastika), Lyudmila Quliyeva (akademik avarçəkmə, kanoe slalom, kanoe sprint), Ramil Vəliyev (cüdo), Rauf Əliyev (sərbət güləş), Hicran Şərifov, Vüqar Vəliyev (hər ikisi yunan-Roma güləşi), Zaur Abdullayev (boks).

Modern.az