Dövlət Dəniz Admnistrasiyasının Gəmilərin Hərəkətinin İdarə olunması Milli Mərkəzində Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, Dövlət Dəniz Administrasiyası, SOCAR və Azərbaycan Xəzər Dəniz Gəmiçiliyi QSC-nin aparıcı mütəxəssislərindən ibarət tərkibdə yaradılan Qərargah tərəfindən təsdiq edilən plana uyğun olaraq, müəyyən edilən sektorlar üzrə itkin nefyçilərin axtarış-xilasetmə əməliyyatları davam etdirilir.

Qərargahdan Modern.az-a verilən məlumata görə, həyata keçirilən axtarış – xilasetmə əməliyyatları nəticəsində Neftçala rayonunun 1-ci Mayak kəndi ərazisində sahildə meyiti tapılan şəxsin, "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin estakadasının uçması zamanı itkin düşən neftçilərdən biri – operator Hacıəliyev Həsənağa Hüseynağa oğlu olması təsdiq edilərək, ailəsinə təhvil verilib.

Xatırladaq ki, 15 dekabr 2016-cı ildə səhər saat 05:00 radələrində Xəzər dənizində 41 metr/saniyə sürəti ilə əsən güclü külək "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin sağ və sol hissəsində yerləşən estakadanın uzunluğu təqribən 150 metr olan hissəsi və ona bitişik olan meydançanı, həmçinin üzərindəki yaşayış budkasını da uçurub.
 

Hadisə nəticəsində Neft Yığım Məntəqəsinin növbədə olan 5 nəfər və yaşayış budkasında olan 5 nəfər (cəmi 10 nəfər) əməkdaşı itkin düşüb:

 1. Zülfüqarov Güloğlan - maşinist

 2. Zülfüqarov Azay - operator

 3. Qurbanov Vidadi - operator

 4. Həsənov Elçin - mexanik

 5. Hacıəliyev Həsənağa - operator

 6. Qafarov İlham – operator (meyiti tapılıb)

 7. Əsədov Samir - operator

 8. Bəhrəmov Cavid - operator

 9. Abbasov Ramiz - maşinist

 10. Rüstəmov Qorxmaz – operator.

Beləliklə, indiyəədək itkin neftçilərdən iki nəfərin - Qafarov İlham Əlihüseyn oğlu və Hacıəliyev Həsənağa Hüseynağa oğlunun meyiti tapılaraq ailəsinə təhvil verilib.

Namidə BİNGÖL