Թուրքիայի Սիլիվրիի ափերի մոտ բախվել են երկու առևտրային նավեր:
Modern.az-ը հայտնում է, որ միջադեպը տեղի է ունեցել սեպտեմբերի 2-ին, տեղական ժամանակով ժամը 03:00-ի սահմաններում, Սիլիվրիի ափերից 18 ծովային մղոն հարավ:
Ստամբուլի նահանգապետարանի տվյալներով՝ Թուրքիայի դրոշի ներքո նավարկող «ALSU» նավը, որը Կոջաելիից ուղևորվում էր Ալիաղա, և «TUĞBERK İMAMOĞLU» նավը, որը Իսքենդերունի նավահանգստից շարժվում էր դեպի Սև ծովի Էրեգլի, բախվել են անհայտ պատճառով:
Նախնական հետաքննության ընթացքում «ALSU» նավի վրա տեսանելի վնասներ չեն հայտնաբերվել: Մյուս նավի և դրա վրա գտնվող անձնակազմի 10 անդամների հետ կապ հաստատել չի հաջողվել:
Դեպքի վայր են ուղարկվել Թուրքիայի Ափամերձ անվտանգության գլխավոր վարչության և Ափամերձ պահպանության Մարմարայի և Նեղուցների հրամանատարության բազմաթիվ ծովային միջոցներ, ինչպես նաև ուղղաթիռ:
Երկրորդ նավը և անձնակազմի անդամներին գտնելու համար շարունակվում են որոնողափրկարարական աշխատանքները ծովից և օդից: Բախման պատճառը դեռևս անհայտ է:
