Artıq bir neçə gündür, həm Bakı və Abşeron ərazisində, həm də bölgələrdə intensiv yağışlar yağır. Təbii olaraq bu cür hava durumu müəyyən problemlərin ortaya çıxması ilə nəticələnib. Bu baxımdan əksəriyyət adamı yağışların nə zaman kəsəcəyi maraqlandırır.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktor əvəzi Gülşad Bayramova Modern.az-a açıqlamasında bildirib ki, ölkə ərazisində müşahidə edilən qeyri-sabit hava şəraiti oktyabrın 5-dək davam edəcək:
“Artıq oktyabrın 5-i gündüz saatlarından hava şəraitinin sabitləşəcəyi, gün ərzində əsasən yağmursuz keçəcəyi gözlənilir. Ayın 6-dan etibarən isə havanın temperaturu bu günlərlə müqayisədə tədricən 2-3 dərəcə yüksələcək”.
