Xəbər verdiyimiz kimi, Ukrayna Prezidenti Volodimir Zelenski müdafiə naziri Aleksey Reznikovu istefaya göndərəcəyini bildirib.

2021-ci ilin noyabr ayında müdafiə naziri təyin edilən Reznikov müharibə dövründə Qərbin milyardlarla dollarlıq hərbi yardımını təmin etməyə kömək edib, lakin son aylar Müdafiə Nazirliyində rüşvət və korrupsiya iddiaları yayılıb. Reznikov iddiaların böhtan olduğunu bildirib.

Qərar Ukraynada korrupsiyaya qarşı mübarizə fonunda verilib. Müşahidəçilər deyir ki, Kiyev Avropa İttifaqına (Aİ) üzv olmaq üçün müraciət edib və müharibənin sonu görünmədiyi üçün ictimaiyyət korrupsiyaya qarşı çox həssas olub.

Zelenski nazirin istefaya göndərilməsinin səbəbləri barədə ətraflı məlumat verməyib: “İnanıram ki, nazirliyin həm ordu, həm də bütövlükdə cəmiyyətlə yeni yanaşmalara və digər qarşılıqlı fəaliyyət formatlarına ehtiyacı var”.

Müharibə zamanı Reznikov Almaniya istehsalı olan əsas döyüş tankları və HIMARS raket artilleriyası da daxil olmaqla, Ukraynaya güclü hərbi texnikanın tədarükü ilə bağlı tabuları aradan qaldırmaq üçün Qərbdə lobbiçilik edib. Hazırda Kiyev ABŞ istehsalı olan F-16 qırıcılarını almağa hazırlaşır.

İngilis dilində sərbəst danışa bilən Reznikov müttəfiq ölkələrin müdafiə nazirləri və hərbi rəsmiləri ilə güclü münasibət qurub. Parlament üzvlərindən biri onun Londona yeni səfir təyin ediləcəyini bildirib.

Yanvar ayında yerli mətbuatda Reznikovun rəhbərlik etdiyi Müdafiə Nazirliyinin şişirdilmiş qiymətlərlə ərzaq alması ilə bağlı çoxsaylı iddialar səsləndirilib.

O, ərzaq müqaviləsində şəxsən iştirak etməsə də, bəzi ukraynalı şərhçilər onun baş verənlərə görə siyasi məsuliyyət daşımalı olduğunu bildiriblər.

Ötən ay Ukrayna mediası Müdafiə Nazirliyini ordu üçün qış paltolarının alınması zamanı korrupsiyada ittiham edib. Reznikov qanun pozuntuları ilə bağlı iddiaları rədd edib və dəfələrlə qarayaxma kampaniyasının hədəfinə çevrildiyini bildirib.