Xəbər verdiyimiz kimi, bu il ali məktəblərə qəbul imtahanları ilə bağlı ciddi yeniliklər var. Əsas dəyişikliklərdən biri odur ki, abituriyentlərə iki dəfə imtahan vermək şansı veriləcək.
Ali təhsil müəssisələrinin bakalavriat səviyyəsinə qəbul qaydalarında edilən dəyişikliyə əsasən, həm bu ilin və həm də əvvəlki illərin məzunları iki imtahanda iştirak edə bilərlər.
Abituriyentlər müsabiqədə hansı imtahanın nəticəsi ilə iştirak edəcəyini özləri müəyyən edəcəklər.
Bəs builki qəbul imtahanları nə vaxt keçiriləcək?
Modern.az-ın Dövlət İmtahan Mərkəzindən əldə etdiyi məlumata görə, qəbul imtahanlarının məzmunu, forması, aparılma texnologiyası, davametmə müddəti, keçiriləcəyi yer və günlər bu qurum tərəfindən müəyyən edilib və Azərbaycan Respublikasının Təhsil Nazirliyi ilə razılaşdırılıb.
Bu il ali məktəblərə qəbul imtahanlarının may və iyul aylarında keçirlməsiu planlaşdırlıb. İmtahanların həmin ayların hansı günlərində keçiriləcəyi barədə isə yaxın vaxtlarda ictimaiyyətə məlumat veriləcək.
Qəbul imatahanlarından sonra ixtisas seçimi, ardınca isə ilə məktəbələrə yeriləşdirmə - yəni müsabiqə keçirələcək ki, bunun nəticələrinin də avqustda olacağı nəzərdə tutulur.
Yeri gəlmişkən, bu ildən ali məktəblərə qəbul üzrə test imtahanları ödənişli olacaq.
Azərbaycan Tarif Şurası hazırda müzakirələr aparır və yaxın vaxtlarda imtahanlarda iştiraka görə ödənişlərin məbləği elan olunacaq.
Ekspert Rövşən Ağayev ali və orta ixtisas məktəblərinə yeni qəbul qaydaları ilə bağlı bir məqama diqqət yetirməyi vacib bilir.
“Tələbə olmaq istəyənlərə il ərzində iki dəfə şans vermək müsbət addımdı. Xüsusən də abituryentlərin stressini azaltmaq baxımından faydası ola bilər.
Amma bu "ali təhsil alanların sayı artmalıdır" təklifinin bir əmması var. Gerçəkdən Azərbaycan əhalisinin hər 100 min nəfəri hesabı ali məktəb tələbələrinin sayına görə, inkişaf etmiş ölkələrdən, eləcə də bir sıra keçid ölkələrindən 3-4 dəfə geri qalır. Amma say artımı onsuz da aşağı olan keyfiyyətin daha da pisləşməsi hesabına baş verməməlidir. Buna görə də ali təhsil pilləsinə keçid üçün hər bir ixtisas üzrə (qrup üzrə yox) minimal keçid balları müəyyən edilməsi çıxış yollarından biri ola bilər. Məsələn, maksimum balın (700 bal) 40%-dən (280 bal) aşağı balla heç bir ixtisas üzrə ali məktəblərə qəbul aparılmamalıdır. Bütün ixtisaslar üzrə minimum keçid balı isə ixtisasların mürəkkəbliyindən, iqtisadiyyat üçün faydalılığından asılı olaraq 280 baldan yüksək olmaq şərtilə müəyyən edilə bilər. Məsələn, hər abituryent bilməlidir ki, riyaziyyat müəllimi olmaq istəyirsə, 400-dən aşağı bal toplamamalıdır.
Daha bir təklif pullu ali təhsillə bağlıdır. Bu gün Azərbaycanda dövlətin ali təhsil xərclərinin ÜDM-də payı 0.3% ətrafındadı. Dünyanın qabaqcıl ölkələrində həmin göstərici 1-2% intervalında dəyişir. Bu gün Azərbaycanda dövlət ali məktəblərində oxuyanların 76-77%-i ödənişli təhsil alır. Yoxsulluğun real miqyasının yüksək olduğu ölkədə hökumət bütün insanların ali təhsilə əlçatanlığını artırmaq üçün ali təhsil xərclərini artırmalıdır. Bunun üçün hökumət belə bir hədəf müəyyən edə bilər: maksimum balın (700 bal) məsələn, üçdə ikisindən (450 bal) yüksək bal toplayan bütün abituryentlərin xərclərini dövlət qarşılayacaq. Təhsil Nazirliyi tələbələrin sayını artırmaq istəyirsə, bu da bir stimullaşdırıcı mexanizm ola bilər”.
Modern.az
