Aprelin 11-də Azərbaycanda növbədənkənar prezident seçkiləri keçirilib. Seçkilərdə  Yeni Azərbaycan Partiyasının sədri İlham Əliyev səslərin 86 faizini toplayaraq qalib olub.  Sonrakı yerlərdə isə  öz  təşəbbüsü ilə namizədliyi irəli sürülmüş Zahid Oruc – 3,11%; Bütöv Azərbaycan Xalq Cəbhəsi Partiyasının sədri Qüdrət Həsənquliyev 3,04 faiz; Azərbaycan Demokrat Partiyasının sədri Sərdar Cəlaloğlu – 3,02%;  Müasir Müsavat Partiyasının sədri Hafiz Hacıyev – 1,51%;  Azərbaycan Sosial Demokrat Partiyasının sədri Araz Əlizadə – 1,39%;  Milli Dirçəliş Hərəkatı Partiyasının sədri Fərəc Quliyev – 1,18%;  "Cəbhəçilərin təşəbbüs qrupu" tərəfindən namizədliyi irəli sürülmüş Razi Nurullayev - 0,75% səslə qərarlaşıb.

Modern.az saytı prezident seçkiləri, onun nəticələri ilə bağlı Milli Məclis deputatlarının fikrini öyrənib.

Milli Məclisin deputatı  Eldar İbrahimov:

“Prezident seçkiləri çox yüksək səviyyədə keçirildi. Yerlərdə olarkən, təbliğat apararkən  əlbəttə, bütün əhalinin  İlham Əliyevi dəstəklədiyini müşahidə etdik. Bu dəstək dünən sözsüz, öz bariz nümunəsini göstərdi.  Mən təqribən 15 seçki məntəqələrində  respublika üzrə müşahidəçi kimi iştirak etdim.  İnsanların yüksək həvəslə seçkiyə gəldiyini gördüm. Bilirəm ki, əksəriyyəti də İlham Əliyevə səs verirdi. Ən vacib məsələ odur ki, artıq Azərbaycanda səsvermə mədəniyyəti formalaşıb və bu istiqamətdə irəliləyiş var. İnsanlar böyük məsuliyyətlə səsvermədə iştirak edirdilər. Dünən seçki məntəqələrində bir neçə beynəlxalq təşkilatların nümanyəndəsi ilə də rastlaşdım. Hamısı Azərbaycanda yüksək səviyyədə seçki keçirildiyinə təəccüblənirdilər. İnsanların davamiyyəti, aktivliyi, bütün sənədləşmə işləri yaxşı təşkil olunmudu. Son dərəcə şəffaf, demokratik, azad, sakit bir seçki keçirildi.

İlham Əliyev təkcə Yeni Azərbaycan Partiyasının namizədi deyil, həm də bütün Azərbaycan xalqının namizədidir. Buna görə də insanlar ona səs verdilər. Bugünkü, gələcək əmin-amanlığımıza, sabitliyimizə, ölkəmizin müdafiə qüdrətinə, inkişafına səs verdilər. Fürsətdən istifadə edib səs verən bütün insanlara, xalqımıza minnətdarlığımı bildirirəm.
Cənab prezident İlham Əliyevə qarşıdakı 7 ildə yeni uğurlar arzu edirəm. O cümlədən Azərbaycanın ağrılı yeri olan Dağlıq Qarabağ probleminin  həllini tapacağına, ölkəmizin ərazi bütövlüyünün təmin olunacağına inanıram. Bundan böyük xoşbəxtlik yoxdur”.

Milli Məclisin deputatı  Rasim Musabəyov:

“Dünən keçirilən prezident seçkiləri ilə bağlı heç kəs nə narazılıq, nə də pozuntular iddiası ilə  çıxış edib. O cümlədən müşahidəçilər də prosesi müsbət qiymətləndirib. Mən də onlarla həmfikirəm. Çünki  öz müşahidələrim də bunu təsdiq edir. Seçki nəticələri isə gözlənilən idi. Düşünürəm ki, əslində cənab prezident İlham Əliyev bundan da yüksək səs toplamalı idi. Çünki rəqibləri nəinki ona yaxındır, hətta müqayisə olunmayacaq dərəcədə ondan aşağıda idi”.

Milli Məclisin deputatı  Asim Mollazadə:

“Biz seçki prosesini müşahidə etdik. Düşünürəm ki, haqlı olaraq prezident İlham Əliyev qalib gəldi. Və burada heç bir şübhədən söhbət gedə bilməz. Sadəcə olaraq ümidvaram ki, yeni dönəmdə ölkədə geniş miqyaslı islahatlar davam edəcək”.