Bu gün 62 nömrəli məktəb-liseyində Azərbaycan Respublikasının ərazi bütövlüyü uğrunda şəhid olan Xalid Quliyevin xatirəsinə və 20 yanvar faciəsinin 22-ci ildönümünə həsr olunmuş tədbir keçirilib. Modern.az saytı xəbər verir ki, tədbirdə şəhid X.Quliyevin anası Aynişan Quliyeva, məktəb müəllimləri və şagirdlər iştrak ediblər.
62 nömrəli məktəb-litseyin tarix müəllimi Vüsal Musayev bildirib ki, bu cür tədbirləri keçirtməkdə məqsəd vətən uğrunda canından keçən igid oğlanları gənc nəsilə, məktəblilərə tanıtmaqdı.
“Belə tədbirlər birinci dəfə deyil, mütəmadi olaraq bizim məkdəbdə keçirilir”.
Daha sonra şagirdlərin hazırladığı bədii kompozisya nümayiş olunub. Burada şagirdlər tərəfindən şəhid X.Quliyevin döyüş şücaəti qısaca olaraq xatırlanıb. Eyni zamanda 20 yanvar faciəsi ilə bağlı sujetlər göstərilib və şagirdlər tərəfindən şeirlər səsləndirilib.
Məktəb direktoru Mətanət Cabbarlı bildirib ki, 62 nömrəli məktəb-litsey tərəfindən mütəmadi olaraq belə tədbirlər keçirilir.
“Bu cür tədbirlərdə gənc nəslimizə bir daha söylənilir ki, vətənimizin bu cür mübariz və igid oğulları var. İşğal olunmuş torpaqlarımızı azad olunması üçün bizim əsgərlərimiz hər zaman Ali Baş Komandanın əmrini gözləyirlər”.
Sonda Azərbaycan Təhsil İşçiləri Azad Həmkarlar İttifaqı adından Nizami rayonunda uzun müddət səmərəli ictimai və pedoqoji fəaliyyətinə görə 62 nömrəli məktəb-liseyin tarix müəllimi Vüsal Musayev Fəxri fərmanla təltif edilib.
Mail Ağaxanov
