Modern.az xəbər verir ki, iyunun 12-də Milli Məclisin növbədənkənar sessiyasının ilk iclasında «Azərbaycan Respublikasının keçmiş Prezidentinin və onun ailə üzvlərinin təminatı haqqında» Azərbaycan Respublikasının Konstitusiya qanunu ikinci səsverməyə çıxarılıb. 109 lehinə, 1 nəfər əleyhinə olmaqla qanun qəbul olunub.
Bu qanun prezident vəzifəsini tutmuş, vəfat etmiş, prezident səlahiyyətlərinə xitam verilmiş şəxslərə və ailə üzvlərinə şamil ediləcək.
Maraqlıdır, qanunun əleyhinə səs verən o bir nəfər deputat kimdir? Modern.az-ın əməkdaşı bunu dəqiqləşdirməyə çalışıb. Məlum olub ki, eks-prezidentlər haqqında qanunun əleyhinə səs verən deputat Ana Vətən Partiyasının təmsilçisi Zahid Orucdur. Zahid Oruc bunu onunla əsaslandırır ki, sənədin eks-prezident Ayaz Mütəllibova şamil olunmasını istəmədiyinə görə belə addım atıb.
Yeri gəlmişən, belə düşünən deputatlardan biri də Ana Vətən Partiyasının sədri Fəzail Ağamalıdır. Lakin F.Ağamalı bugünkü iclasda iştirak etməyib.
