Sabah Riçard Morninqstarın andiçmə günüdür
Sabah Riçard Morninqstar ABŞ-ın Azərbaycandakı səfiri vəzifəsinə başlamaq üçün and içəcək.
Riçard Morninqstar and içdikdən sonra vəzifəsinin icrasına başlaya bilər. Yeni səfirin ölkəmizə yaxın həftələrdə gələcəyi gözlənilir.
Xatırladaq ki, prezident Barak Obama aprelin sonlarında Azərbaycana səfir postuna ABŞ Dövlət Departamentinin Avrasiyada energetika məsələləri üzrə xüsusi nümayəndəsi Riçard Morninqstarın namizədliyini irəli sürüb. İyunun 29-da ABŞ Senatı onun bu posta namizədliyini təsdiqləyib.
Modern.az ABŞ-nın Azərbaycana yeni təyin olunmuş səfiri haqqında qısa bioqrafik məlumatı oxucuların nəzərinə çatdırır.
Riçard Morninqstar 1945-ci ildə anadan olub. Harvardda kolleci və 1970-cı ildə Stanford hüquq məktəbini bitirib. 1970-cı ildən 1981-ci ilə kimi “Peap & Brown” hüquq firmasında işləyib. Daha sonralar “Kostar” Korporasiyasında çalışıb. 1990-cı ildən korporasiyanın idarə heyətinin üzvü olub. 1998-ci ilin iyul ayından Xəzər hövzəsinin enerji diplomatiyası üzrə prezidenti və dövlət katibinin xüsusi müşaviri təyin edilib. R. Morninqstar Bakı-Tbilisi-Ceyhan boru kəmərinin təşəbbüsçülərindən biridir. 1999-2001-ci illərdə R. Morninqstar Avropa Birliyində ABŞ səfiri kimi çalışıb. “Nabukko” boru kəməri üzrə hökumətlərarası sazişin imzalanmasında ABŞ tərəfini təmsil edib. O, bu layihədə İranın iştirakına razılıq verməyib. 27 aprel 2012-ci ildən ABŞ-ın Azərbaycandakı səfiri üçün namizədliyi irəli sürülüb. 2012-ci ilin iyun ayından bu vəzifəni yerinə yetirməyə başlayıb.
Yeni səfir ailəlidir, onun iki oğlu, iki qızı var.
İndiyə kimi ABŞ hökuməti Azərbaycana 9 səfir təyin edib. İlk təyin olunmuş səfir Robert Finn 1992-ci ildə bir neçə ay ərzində bu postu tutub. Riçard Mayls 1992-ci ildən 1993-cü ilə kimi Amerikanın Azərbaycandakı səfiri olub. Digər səfirlər isə bu şəxslərdir: Riçard Kozlariç (1994-1997), Stenli Eskudero (1997-2000), Ross Uilson (2000-2003), Rino Haniş (2003-2006), Enn Dersi (2006-2009), Metyu Brayza (2011-2012) və nəhayət, 9-cu səfir Riçard Morniqstar.
Nihadə Eyyubova
