Azərbaycan Boks Federasiyasının vitse-prezidenti, Milli Olimpiyada Komitəsinin baş katibi, millət vəkili Ağacan Əbiyevin Olimpiadada qələbəsi əlindən alınan boksçumuzla bağlı qalmaqala görə Londondan xaric edildiyi barədə məlumat yayılıb. Bu barədə məlumat «Eurosport» saytında və digər xarici KİV-lərdə dərc olunub.
Modern.az xəbər verir ki, Ağacan Əbiyev “Azadlıq” radiosuna müsahibəsində London Olimpiya Oyunları çərçivəsində təşkil olunan boks yarışlarından uzaqlaşdırlması barədə məlumatlara münasibət bildirib. O, Beynəlxalq Həvəskar Boks Federasiyasının (AİBA) bu barədə yazılı qərarının hələ ona verilmədiyini deyib:
- Mən burdayam kim məni uzaqlaşdırıb, mən kosmonavt-zadam ki, məni uzaqlaşdırsınlar.
- “Reuters” agentliyi yazır ki, siz Azərbaycan idmançıları və federasiya rəsmiləri ilə ünsiyyətə cəhd etmisiniz və bu da AİBA-nın qaydalarına zidd olduğu üçün yarışlardan kənarlaşdırılmısınız.
- Mən Azərbaycan komandası ilə həmişə ünsiyyətdəyəm də...
- Ağacan müəllim, AİBA-nın prezidenti də belə bir qərar verdiklərinə təssüfləndiyini bildirib. Amma bunun verilməli olduğunu deyib.
- Təssüf edirlərsə, qoy eləsinlər. Onların planında belə şeylər var. Bir şey olmaz hər şey yaxşı olacaq.
- Bəs bu qərara necə yanaşırsınız?
- Kimlərsə deyəsən bizim komandaya sataşmaq istəyir. Bilmirlər hardan yapışsınlar. Elə adama yapışıblar ki, istəyirlər həmin adam reaksiya versin bu məsələlərə, bu da alınmaz. Mən burda işləyirəm və hər şey yaxşı olacaq.
- Ağacan müəllim, öz ölkəsinin idmançıları və federasiya rəsmiləri ilə ünsiyyətə cəhd, bu nə deməkdir?
- Bunu AİBA-dan soruşun, orda indi elə səviyyəsiz adamlar var ki, heç sözlərinin məntiqi yoxdur. İkincisi də burda müharibə gedir, yoxsa mən hansısa kəşfiyyata işləyirəm?
- Sizə AİBA-nın qərarını veriblərmi siz yarışlardan uzaqlaşdırılırsınız?
- Yox, mənə telefonla deyiblər. Mən o qərarı heç görməmişəm. İndi yarış olacaq mən özüm AİBA-nın prezidentinə yaxınlaşacam soruşacam. Mənə heç bir söz deməyiblər. Özləri üçün yazıblar, qoy yazsınlar.
- Ağacan müəllim bir də qeyd olunur ki, Azərbaycan boksçusu ilə yaponyalı boksçunun döyüçünə hakimlik edən türkmənistanlı hakimin də yarışlardan uzaqlaşdırıldığı bildirilir.
- Tək türkmənistanlı hakim deyil, bir neçə hakim kənarlaşdırılıb. Hakimdir səhv edir. Kimisə 5 gün, kimisə 3 gün və ya 1 gün və ya tamamilə uzaqlaşdırılar. Bu qaydadır, hər yerdə belədir. Baxılır ki, hansısa hakim çox böyük səhv buraxıb deyilir ki, get istirahət et, özünə gəl, sonra gəl. Elələri də var səhv ciddi olur tamamilə yarışlardan uzaqlaşdırılır.
- Bəs azərbaycanlı boksçunun nəticələrinin ləğv edilməsini necə qiymətləndirirsiniz?
- Mən yenə deyirəm, burda bunların nə isə oyunu gedir. Azərbaycan komandasına elə diqqətlə yanaşırlar. Mən bilirəm bu hardan qaynaqlanır, amma bu telefon söhbəti deyil. Eybi yoxdur, hələ tezdir, olimpiya oyunlarından sonra bu barədə söhbət edərik.
Modern.az xatırladır ki, London Yay Olimpiadası çərçivəsində təşkil olunan boks yarışlarının 1/8 final mərhələsində yaponiyalı Şatori Şimizu və azərbaycanlı Məhəmməd Əbdülhəmidov arasında keçirilən görüş böyük qalmaqala səbəb olub. 56 kq çəki dərəcəsində mübarizə aparan boksçuların duelində azərbaycanlı idmançı qalib elan olunsa da, yaponların şikayətindən sonra onun nəticələri ləğv edilib və yaponiyalı boksçu qalibiyyəti açıqlanıb.
Görüşün baş hakimi türkmənistanlı referi İşanquli Meretniyazovun da oyunlardan kənarlaşdırıldığı bildirilir. Hakim İşanquli Meretniyazov avqustun 1-də Məhəmməd Əbdülhəmidovun 6 dəfə yıxılmasına baxmayaraq oyunu dayandırmayıb. O, ədalətli hakimlik etməməkdə ittiham olunur.
Modern.az
