Հայաստանը կարող է երկաթուղային կապ ունենալ Իրանի հետ՝ անցնելով Ադրբեջանի տարածքով, այդ թվում՝ Նախիջևանով։
Modern.az-ը հայտնում է, որ այս մասին հայտարարել է Հայաստանի արտաքին գործերի նախարար Արարատ Միրզոյանը՝ խորհրդարանում պատասխանելով TRIPP ծրագրի վերաբերյալ հարցերին։
Նախարարի խոսքով՝ Ադրբեջանը հնարավորություն կստանա տեղաշարժվել Հայաստանի տարածքով դեպի Նախիջևան և հակառակ ուղղությամբ։ Իսկ Հայաստանը, փոխադարձաբար, կկարողանա կապ հաստատել ինչպես երկրի առանձին հատվածների, այնպես էլ երրորդ երկրների միջև՝ օգտագործելով Ադրբեջանի տարածքն ու ենթակառուցվածքները։
Միրզոյանը նշել է, որ Հայաստանը կարող է հնարավորություն ստանալ բեռներ տեղափոխել Նախիջևանով դեպի Իրան, իսկ Ադրբեջանի տարածքով՝ դեպի Կենտրոնական Ասիա, Չինաստան և այլ ուղղություններ։
Անդրադառնալով ծրագրի շրջանակներում սահմանային ընթացակարգերի կազմակերպմանը՝ նախարարը նշել է, որ «front office» և «back office» մեխանիզմի նպատակը ուղևորների և բեռների անցումը հեշտացնելն ու արագացնելն է։ Նրա խոսքով՝ որոշումները կկայացնեն Հայաստանի համապատասխան պետական մարմինների աշխատակիցները։
Միրզոյանը նաև ընդգծել է, որ ծրագիրը չի սահմանափակվում միայն Մեղրիի տարածքով անցնող երկաթուղով։ Նա նշել է, որ հնարավոր նավթի և գազի խողովակաշարերի երթուղիները դեռ չեն որոշվել, և այդ ենթակառուցվածքները կարող են անցնել նաև Հայաստանի այլ տարածքներով։
Նախարարը հայտարարել է, որ երկաթուղում կանգառներ ստեղծելու հարցը մինչ այժմ չի քննարկվել։ Այնուամերայնիվ, նա անհրաժեշտ է համարել կանգառների առկայությունը՝ հաշվի առնելով Հայաստանի կողմից այդ գծի օգտագործումը բեռնափոխադրումների և ուղևորափոխադրումների համար։
