Ռուսաստանը ԱՄՆ-ի կողմից միջին և հեռահար հրթիռային համալիրների տեղակայումը Նորվեգիայում գնահատում է որպես ՆԱՏՕ-ի կողմից կայունությունը կտրուկ խախտող քայլերից մեկը:
Modern.az-ը հայտնում է, որ այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով՝ Նորվեգիայում ցամաքային հրթիռային համալիրների տեղակայումը ցույց է տալիս Ռուսաստանի տարածքի խորքերին հարվածներ հասցնելու ՆԱՏՕ-ի մտադրությունը։
Զախարովան պնդել է, որ այդ կայանքները կարող են նաև հեռահար հրթիռներ արձակել։ ՌԴ ԱԳՆ պաշտոնյայի կարծիքով՝ նման հրթիռների տեղակայումը կարող է ՆԱՏՕ-ին հնարավորություն տալ թիրախավորել Ռուսաստանի եվրոպական մասի զգալի հատվածը, ներառյալ Մոսկվան։
Նշենք, որ ԱՄՆ-ն ավելի վաղ Նորվեգիայում տեղակայել էր միջին և մերձավոր հեռահարության հրթիռների համար նոր արձակման կայանք։ Այսպիսով, Նորվեգիան դարձավ Եվրոպայում երկրորդ երկիրը, որտեղ տեղակայվեցին ԱՄՆ-ի այս տիպի համակարգերը։
Ըստ տեղեկությունների՝ խոսքը «Mk 70» համալիրի մասին է, որն ունակ է արձակել տարբեր տեսակի հրթիռներ, այդ թվում՝ «Tomahawk» թևավոր հրթիռներ։ Համակարգը Նորվեգիա է բերվել ԱՄՆ-ի, Մեծ Բրիտանիայի և Նորվեգիայի համատեղ զորավարժությունների շրջանակներում։
