Զանգեզուրի միջանցքի շահագործումից հետո Նախիջևանի Ինքնավար Հանրապետությունում նախատեսվում է ձեռնարկատերերի համար կիրառել նոր արտոնություններ և նպատակային լոգիստիկ աջակցության մեխանիզմներ։
Modern.az-ը հայտնում է, որ այս մասին իր սոցիալական ցանցի էջում գրել է Միլի Մեջլիսի պատգամավոր Վուգար Բայրամովը։
Պատգամավորը նշել է, որ Նախագահ Իլհամ Ալիևի հրամանագրով փոփոխություններ են կատարվել «Նախիջևանի Ինքնավար Հանրապետության սոցիալ-տնտեսական զարգացման 2023-2027 թվականների պետական ծրագրում»։
Նոր փոփոխությունների համաձայն՝ Զանգեզուրի միջանցքի բացումից հետո լրացուցիչ հնարավորություններ կստեղծվեն Նախիջևանում արտադրված ապրանքների ցամաքային ճանապարհով արտահանման համար։ Այս հնարավորությունների լայն կիրառումը խթանելու նպատակով տարբեր արտոնությունների կիրառումը կգնահատվի առանձին։
Վուգար Բայրամովը նշել է, որ միջանցքի շահագործումը կնպաստի Նախիջևանում ձեռնարկատերերին աջակցելու մեխանիզմների հետագա ընդլայնմանը։
Ծրագրի շրջանակներում նախատեսվում է ձեռնարկատերերին տրամադրել նպատակային լոգիստիկ աջակցություն՝ տեղական արտադրանքի ներքին և արտաքին շուկաներ դուրս գալու արագացման, մրցունակության բարձրացման և փոխադրման ծախսերի օպտիմալացման նպատակով։
Պատգամավորի կարծիքով՝ նոր արտոնությունները կնպաստեն Նախիջևանում տնտեսական ակտիվության, զբաղվածության և արտահանման աճին, ինչպես նաև տեղական արտադրության ամրապնդմանը։
Այնուամենայնիվ, կիրառվելիք արտոնությունների կոնկրետ տեսակները, չափը և պայմանները դեռևս որոշված չեն։ Այս հարցերը կճշտվեն Զանգեզուրի միջանցքի շահագործումից հետո կատարվելիք առանձին գնահատման հիման վրա։
