Fransiyada oʻta oʻng “Milliy birlik” partiyasi yetakchisi Marin Le Penning noroziliklar fonida reytingi oshdi.
Modern.az xabar berishicha, bu haqda “Bild” maʼlumot tarqatgan.
Qayd etilishicha, Ukrainaga yordamni toʻxtatish tarafdori boʻlgan oʻngchi siyosatchining reytingi sentabr oyi oxiridan boshlab uch hafta ichida 32 foizdan 36 foizga koʻtarilgan.
Noroziliklarni qoʻllab-quvvatlagan radikal soʻlchi yetakchi Jan-Lyuk Melanxonning reytingi ham biroz oshib, 16 foizdan 16,5 foizga yetgan. U ikkinchi oʻringa koʻtarilgan.
Markazchi nomzodlarning reytinglarida esa pasayish qayd etilgan. Sobiq bosh vazir Eduard Filipning reytingi 14 foizdan 12 foizga tushgan. Makron partiyasining nomzodi Gabriel Attalning reytingi esa 5 foizga tushgan. Markaz-soʻl kuchlar vakili Rafael Glyukman 13,5 foiz qoʻllab-quvvatlashga ega.
Prognozlarga koʻra, ikkinchi turda Marin Le Pen barcha mumkin boʻlgan raqiblari ustidan ishonchli gʻalaba qozonadi. “Milliy birlik” partiyasi yetakchisi Jan-Lyuk Melanxonga qarshi 68 foiz, Eduard Filipga qarshi 56 foiz, Rafael Glyukmanga qarshi 57 foiz, Gabriel Attalga qarshi 58 foiz, Fransua Ollandga qarshi esa 59 foiz ovoz toʻplaydi.
