Sabiq daxili işlər naziri İsgəndər Həmidovun kino çəkilişi zamanı xalq artisti Rasim Balayevi guya, döyməsi barədə mübahisəyə kinorejissor Əbdül Mahmudov da qarışdı.
“Firəngiz” filmində düşmüş dava barəsində Modern.az-a açıqlamasında rejissor hadisənin baş verdiyini təsdiqlədi. Ə.Mahmudov filmin Kəlbəcərdə, “İstisu” istirahət zonasında çəkildiyini bildirdi.
“Bu, 1972-ci ildə olmuş əhvalatdır. O zaman filmin bir hissəsini Kəlbəcərin “İstisi” istirahət zonasında çəkirdik. Orada SSRİ-nin hər bölgəsindən insanlar, o cümlədən cavan qızlar, xüsusən nazənin rus xanımları gəlirdi. Çəkiliş heyətinin üzvləri orada darıxmamaq üçün rəqs gecələri təşkil edirdi. Onda yerli adamlarla texniki heyət arasında qız üstündə dava düşdü. Həmin gün “Gəlin qayası” adlandırılan yerdə axşam çəkilişlərini edirdik, ona görə gec qayıtmışdıq. İsgəndər Həmidov həmin vaxt orada istirahət edirdi və ya vəzifə borcundan irəli gələrək, ya yerli adam, sözü keçən ağsaqqal kimi davanı sakitləşdirmişdi. Biz gələndə artıq İsgəndər Həmidov hər iki tərəfin adamlarını yığaraq barışıq elan edib, qonaqlıq verirdi”.
Ə.Mahmudov davanın elə də böyük olmadığını və kiminsə döyülmədiyini vurğuladı. “Sadəcə çəkiliş heyətindəki işıqçı yerli adamla dalaşmışdı və uşaqlar müdafiəyə qalxmışı, şillə-təpik olmuşdu. Amma böyük dava, qan axıdılması söhbəti olmayıb”.
Qeyd edək ki, “Firəngiz” filmi 1975-ci ildə tamaşaçılara təqdim edilib. Filmin rejissorları Əbdül Mahmudov, Ənvər Əbluc olub. Filmdə Vəfa Fətullayeva, Rasim Balayev, Şahmar Ələkbərov, Əliyev, Sadıq Həsənzadə, Muxtar Maniyev iştirak edib.
