(İçsəs)
Satılmaq – maddi qazanc qarşılığında ləyaqətsiz özündənkeçmədir.
***
Satılmazlıq (dönməzlik) – həqiqət uğrunda ləyaqətli özündənkeçmədir.
***
Həqiqətin itirilməsilə sonuclanan hər bir iş – satqınlıqdır.
***
Adam asanlığa satılır – həqiqətsiz üçün satılmaq asandır.
***
Adam həqiqəti yarımçıq, dəyişkəndir – ona görə həqiqətdən keçə bilir.
***
Satılmaq – həqiqəti deməməkdir, yal qarşılığında susmaqdır.
***
Satılmaq – əşyalaşmaqdır, özünəyiyəliyi itirməkdir, onu başqasına verməkdir.
***
Həqiqət ölçüsündən satqınlığın bəraəti – yoxdur.
***
Həqiqətsiz üçün satqınlıq – bəraətdir.
***
Dönməz – qorxmazdır, dönük – qorxaqdır.
***
Satqın – qorxduğu üçün həqiqətdən dönür.
***
Satılmağın kökündə ruhani gücsüzlük, özünəinamsızlıq, həqiqətsizliyə qarşı dayana bilməmək, onunla barışmaq istəyi durur.
***
Həqiqət uğrunda satılmırlar – həqiqətsizlikdən satılırlar.
***
Ləyaqət üçün satılmırlar – ləyaqəti satmırlar.
***
Həyatın maddiyyatını sevmək – həyata satılmaqdır.
***
Həyatın mənasını sevmək – mənaya dönməzlikdir.
***
İnsanı insanlıqdan, həqiqətdən uzaqlaşdıran hər şey – satqınlıqdır.
***
Satqınlıq – heç bir ali insani dəyər tanımamaq, qəbul etməməkdir.
***
Satqın üçün keçilməz insani dəyər – yoxdur, ona görə satqın insani olan hər şeydən keçir.
***
Satqın – həqiqətin yağısıdır.