Dünya tarixinin ən uzun sürən və güclü dövlətlərindən biri Osmanlı İmperatorluğu olub. Osmanoğulları XIII əsrin sonlarında Anadolunun şimal-qərbində, Bizans sərhədinə yaxın bölgədə ortaya çıxan kiçik bir bəylikdən başlayıb. Bu bəylik “Osmanlı Bəyliyi” adlanırdı.
Sülalənin əsasını qoyan Osman Qazı əvvəl Səlcuq dövlətinin tərkibində bir sərhəd bəyi idi. Sonradan bölgədə güclənərək müstəqil dövlət qurdu. 1299-cu ildə qurulan dövlət zamanla güclənərək Balkanları,Yaxın Şərqi, Şimali Afrikanın bir hissəsini, Qafqazın bəzi bölgələrini öz tərkibinə qatdı.
623 il hakimiyyətdə qalan, bir vaxtlar üç qitəyə hökm edən Osmanlı imperiyasının taxtı 1922-ci ildə devrilsə də, sülalənin varisləri bu gün dünyanın müxtəlif ölkələrində həyatlarını davam etdirirlər. Saraylardan sürgünə gedən Osmanoğulları ailəsi indi əsasən Avropa və ABŞ-də yaşayır.
Qeyd edək ki, 1924-cü ildə Türkiyə Cümhuriyyətində Xilafətin ləğvindən sonra Osmanlı sülaləsinin bütün üzvləri ölkədən çıxarıldı. On illərlə vətəndən uzaqda yaşayan ailə üzvləri yalnız 20-ci əsrin ikinci yarısından etibarən tədricən geri dönmək imkanı qazandılar.
Bu gün Osmanlı varisləri haradadır?
Modern.az saytı xəbər verir ki, sülalənin hazırkı nümayəndələri “Osmanoğlu” soyadı ilə tanınır və əsasən Fransa, ABŞ və Türkiyədə yaşayırlar. Ailənin bəzi üzvləri biznes və ictimai fəaliyyətlə məşğuldurlar.
Məsələn, Osmanlı taxtının son vəliəhdlərindən Dündar Əbdülkərim Osmanoğlu uzun illər Suriyada və Avropada yaşayıb, daha sonra Türkiyəyə qayıdıb. O, ailənin simvolik liderlərindən biri kimi qəbul olunur.
Digər bir varis Orhan Osmanoğlu isə Türkiyədə yaşayır və zaman-zaman media və ictimai tədbirlərdə görünür.
Osmanlı varislərinin əksəriyyəti özlərini “tarixi mirasın daşıyıcısı” kimi təqdim edir. Ailə üzvləri daha çox mədəniyyət, tarix və xatirə layihələrində iştirak edirlər.
Bugünkü Osmanoğulları artıq saray həyatından uzaqdır. Bəziləri adi iş həyatı yaşayır, bəziləri isə biznes sahəsində fəaliyyət göstərir. Bununla belə, “Osmanlı sülaləsinin varisi” kimliyi hələ də onlara xüsusi ictimai maraq qazandırır.
