Ֆլինդերսի համալսարանի գիտնականները հետազոտության ընթացքում պարզել են, որ կա կապ սուրճի ամենօրյա օգտագործման և ոսկրերի խտության միջև:
Modern.az-ը հայտնում է, որ հետազոտության արդյունքները հրապարակվել են «Nutrients» ամսագրում:
Հետազոտողները 10 տարի շարունակ հետևել են 65 տարեկանից բարձր մոտ 10 հազար կանանց առողջական ցուցանիշներին: Պարբերաբար գնահատվել է նրանց սուրճի և թեյի օգտագործումը և ազդրի շրջանում ոսկրերի հանքային խտությունը:
Ըստ արդյունքների՝ օրական մոտ 2-3 բաժակ սուրճ խմելը կապված չէր ոսկրերի խտության նվազման հետ: Սակայն այն կանանց մոտ, ովքեր օրական 5 բաժակից ավելի սուրճ էին խմում, դիտվել է ոսկրերի հանքային խտության ավելի ցածր մակարդակ:
Թեյ խմող կանանց մոտ ազդրի շրջանում ոսկրերի խտությունը մի փոքր ավելի բարձր է եղել, քան նրանց մոտ, ովքեր թեյ չեն խմել: Գիտնականները դա կապում են թեյի մեջ պարունակվող կատեխինների հետ: Ենթադրվում է, որ այս բնական միացությունները կարող են նպաստել ոսկրային հյուսվածքի ձևավորմանը և դանդաղեցնել դրա քայքայումը:
Հետազոտողները նշում են, որ կոֆեինը կարող է դեր խաղալ սուրճի ազդեցության մեջ: Թեև լաբորատոր հետազոտությունները ցույց են տվել, որ կոֆեինը կարող է ազդել կալցիումի կլանման և ոսկրերի նյութափոխանակության վրա, նշվում է, որ այս ազդեցությունը մեծ չէ:
Գիտնականները շեշտում են, որ հետազոտության արդյունքները չեն ապացուցում, որ սուրճն անմիջականորեն հանգեցնում է ոսկրերի խտության նվազմանը: Պարզապես հայտնաբերվել է վիճակագրական կապ սուրճի բարձր օգտագործման և ոսկրերի հանքային խտության միջև:
Մասնագետների կարծիքով՝ սուրճի չափավոր օգտագործումը կարող է լուրջ վտանգ չներկայացնել ոսկրերի առողջության համար, սակայն նպատակահարմար է խուսափել սուրճի չափազանց մեծ քանակությամբ ամենօրյա օգտագործումից: Օստեոպորոզի կանխարգելման գործում հիմնականը մնում են բավարար քանակությամբ կալցիումի և վիտամին D-ի ընդունումը, ֆիզիկական ակտիվությունը և ոսկրերի առողջությունը պահպանելու այլ հաստատված միջոցառումները:
