ԱՄՆ նախագահի հատուկ ներկայացուցիչ Սթիվ Ուիթքոֆը և Դոնալդ Թրամփի փեսա Ջարեդ Քուշները այսօր Կիևում կայանալիք շփումների ժամանակ կօգտագործեն Ռուսաստանի նախագահ Վլադիմիր Պուտինի՝ Ուկրաինայի հակամարտության կարգավորման ուղիների վերաբերյալ հայտարարությունները։
Modern.az-ը հայտնում է, որ այս մասին ասել է ՌԴ նախագահի օգնական Յուրի Ուշակովը Կրեմլի բանակցությունների արդյունքների վերաբերյալ իր հայտարարության մեջ։
Նրա խոսքով, Պուտինի, Ուիթքոֆի և Քուշների միջև հանդիպումը բովանդակային, կառուցողական, չափազանց բաց և վստահելի մթնոլորտում է անցել։ Հանդիպումը տևել է ընդհանուր առմամբ 3 ժամ 10 րոպե։ Բանակցություններն անցկացվել են ինչպես աշխատանքային սեղանի շուրջ, այնպես էլ ոչ պաշտոնական մթնոլորտում՝ ճաշի ժամանակ։
Ուշակովը նշել է, որ ԱՄՆ ներկայացուցիչները լրջորեն պատրաստվել են Մոսկվա կատարած այցին և մի շարք առաջարկներ են արել Ուկրաինայի հակամարտության հնարավոր լուծումների վերաբերյալ։ Պուտինը հաստատել է հակամարտությունը քաղաքական և դիվանագիտական ճանապարհներով լուծելու ուղղությամբ ամերիկյան կողմի հետ համատեղ աշխատանքը շարունակելու իր մտադրությունը։
Նշվել է, որ բանակցությունների ընթացքում քննարկվել է ոչ միայն ուկրաինական հարցը։ Կողմերը մտքեր են փոխանակել նաև Ռուսաստանի և ԱՄՆ-ի միջև իրականացվելիք խոշոր նախագծերի շուրջ։
Նշենք, որ սա ԱՄՆ ներկայացուցիչների ութերորդ այցն է Ռուսաստան։
