Պատմության մեջ առաջին անգամ ծերերի թիվը գերազանցել է նորածինների թվին:
Modern.az-ը հայտնում է, որ այս մասին նշվում է ԱՄՆ մարդահամարի բյուրոյի՝ աշխարհի բնակչության տարիքային կառուցվածքի վերաբերյալ զեկույցում:
Ըստ զեկույցի՝ համաշխարհային պատմության մեջ առաջին անգամ 65 և բարձր տարիքի մարդկանց թիվը գերազանցել է 5 տարեկանից ցածր երեխաների թվին: Որպես հիմնական պատճառ նշվում է աշխարհում ծնելիության մակարդակի նվազումը և բնակչության արագ ծերացումը: 2022 թվականին 65-ից բարձր տարիքի անձանց և 5 տարեկանից ցածր երեխաների համաշխարհային բնակչության մեջ մասնաբաժինը մոտավորապես նույնն էր՝ 10 տոկոս: Սակայն դրանից հետո տարեց մարդկանց մասնաբաժինը սկսել է աճել, իսկ փոքր երեխաների մասնաբաժինը՝ նվազել:
Կանխատեսումների համաձայն՝ 2060 թվականին աշխարհի բնակչության 19,6 տոկոսը կլինի 65-ից բարձր տարիքի: 5 տարեկանից ցածր երեխաների մասնաբաժինը կնվազի մինչև մոտ 7 տոկոս:
ԱՄՆ մարդահամարի բյուրոյի տվյալներով՝ 2023 թվականին աշխարհի բնակչության ավելի քան 71 տոկոսն ապրել է այն երկրներում, որտեղ ծնելիության մակարդակը հավասար կամ ցածր է եղել բնակչության պարզ վերարտադրության համար պահանջվող ցուցանիշից՝ մեկ կնոջը մոտ 2,1 երեխա: 2013 թվականին այս ցուցանիշը կազմել է 45 տոկոս:
Ակնկալվում է, որ առաջիկա տարիներին կտրուկ կաճի նաև տարեց բնակչության թիվը: Այսպես, 65-ից բարձր տարիքի մարդկանց թիվը 2025 թվականի 852 միլիոնից կարող է հասնել 2 միլիարդի 2060 թվականին: Այս աճը կկազմի այդ ժամանակահատվածում համաշխարհային բնակչության ընդհանուր աճի մոտ 55 տոկոսը: Կանխատեսվում է, որ աշխարհի բնակչությունը 2025 թվականի 8,13 միլիարդից կհասնի 10,23 միլիարդի 2060 թվականին:
Ներկայումս Եվրոպան մնում է աշխարհի ամենածեր տարածաշրջանը: Այնուամենայնիվ, առաջիկա տասնամյակներում ծերացման հիմնական քանակական աճը տեղի կունենա Եվրոպայից դուրս:
Ասիայում 65-ից բարձր տարիքի մարդկանց թիվը կաճի 487 միլիոնից մինչև 1,24 միլիարդ: Սա կկազմի աշխարհում տարեց բնակչության աճի մոտ երկու երրորդը: Աֆրիկան կմնա աշխարհի ամենաերիտասարդ տարածաշրջանը: Այնուամենայնիվ, մայրցամաքում տարեց մարդկանց թիվը կաճի 60 միլիոնից մինչև 249 միլիոն՝ գերազանցելով Եվրոպայի 214 միլիոն ցուցանիշը:
Իսկ ԱՄՆ-ում 2025 թվականին բնակչության 18,9 տոկոսը կազմել են 65 և բարձր տարիքի անձինք: Այս ցուցանիշը կանխատեսվում է, որ 2060 թվականին կհասնի 23,4 տոկոսի: Այսպիսով, ժողովրդագրական պատկերը ցույց է տալիս բնակչության արագ ծերացումը աշխարհում ծնելիության մակարդակի նվազման և կյանքի տևողության աճի ֆոնին:
