ՌԴ նախագահ Վլադիմիր Պուտինի և Հայաստանի վարչապետ Նիկոլ Փաշինյանի՝ Մոսկվայում կայանալիք հանդիպմանը կքննարկվեն Հայաստանի զարգացման ուղղությունը և հնարավոր հանրաքվեի հարցը:
Modern.az-ը հայտնում է, որ այս մասին սեպտեմբերի 7-ին հայտարարել է Կրեմլի խոսնակ Դմիտրի Պեսկովը։
Պեսկովը նշել է, որ Պուտինն ու Փաշինյանը Բիշքեկում կայացած հանդիպման ժամանակ քննարկել են առևտրատնտեսական համագործակցության կոնկրետ հարցեր, և պայմանավորվածություն է ձեռք բերվել Փաշինյանի՝ Մոսկվա այցի վերաբերյալ։
«Պետությունների ղեկավարները կքննարկեն հիմնական թեման՝ զարգացման ուղղության, Հայաստանի կողմնորոշման ընտրության և հանրաքվեի անցկացման հարցը»,- ասել է Պեսկովը։
Կրեմլի խոսնակը հավելել է, որ Հայաստանի վարչապետի՝ Ռուսաստան կատարելիք այցի ճշգրիտ ամսաթիվը կհամաձայնեցվի դիվանագիտական ուղիներով։
