“Problemli kreditlərlə bağlı verilən Fərmanın icrası elektron növbələşmə prinsipləri əsasında, işi bürokratikləşdirmə, uzun növbələr, lazımsız həyəcam olmadan həyata keçiriləcək”.
Modern.az-ın məlumatına görə, bunu Mərkəzi Bankın İdarə Heyətinin sədri Elman Rüstəmov problemli kreditlərin həllinə dair Prezident İlham Əliyev tərəfindən imzalanan Fərmanla bağlı Real TV-yə müsahibəsində bildirib.
E.Rüstəmov qeyd edib ki, Mərkəzi Bank əvvəldən proseslərin içində olub:
“Biz cənab Prezidentin qəbul etdiyi bu qərara yüksək dəstək veririk. Hesab edirik ki, bu, olduqca mühüm və vaxtında verilmiş qərardır. Təbii olaraq ölkə rəhbərinin bizim qarşımızda qoyduğu tapşırıqları yerinə yetirəcəyik”.
Baş bankir bildirib ki, problemlin həlli üçün böyük vəsait ayrılacaq:
“Vəsait kommersiya banklarının itkilərini qarşılamaqdan ötrü ayrılan kreditdir və dövlət zəmanətilə veriləcək. Kreditlərin indeksasiyasından sonra banklarda açıq valyuta mövqeyi yaranır. Fərmanda da qeyd olunduğu kimi, bu riskləri də biz öz üzərimizə götürəcəyik. Bizim təşkilati işimiz banklarda gedən proseslərin başa çatması, onların, eləcə də Maliyyə Bazarlarına Nəzarət Palatasının sorğuları əsasında prosesin effektivliyinin təşkil olunmasıdır. İkincisi, tez bir zamanda Palata ilə birlikdə işin metodoloji bazasının yaradılmasına nail olmaq, baza yarandıqdan sonra işin banklarda təşkil edilməsidir.
Göründüyü kimi, növbəti dövr üçün bizim də Mərkəzi Bank olaraq işlərimiz həddindən çoxdur. Məqsədimiz bürokratiyasız, insanlarımızı qane edən şəkildə bu prosesi icra etməkdir”.
Elman Rüstəmov deyib ki, ölkə başçısının bu qərarı bank sektoruna əhəmiyyətli dəstək verəcək.
“Xüsusilə kreditlərin daha çox mərkəzləşdiyi kommersiya bankları ciddi dəstək alacaqlar”.
E.Rüstməov qeyd edib ki, həmin bankların əksəriyyəti problemli banklardır:
“Bank sektorunun sağlamlaşdırılması qiymətləndiriləcək. Amma inanmıram ki, bu Fərman bankların kredit aktivliyinin, maliyyə sabitliyinin tam şəkildə bərpa olunmasına gətirib çıxaracaq. İlkin qiymətləndirmədən sonra biz qalan problemlərin həllinə də baxa bilərik”.
Baş bankir növbəti mərhələdə problemin həlli üçün yeni yanaşmalar tətbiq edilə bilcəyini vurğulayıb.
