Armanistonning ikkinchi prezidenti, harbiy jinoyatchi Robert Kocharyan va uning katta o'g'li Sedrak Kocharyan hibsga olindi. Bu haqda Armaniston Korrupsiyaga qarshi kurash qo'mitasi ma'lum qildi.
Modern.az Armaniston OAVlariga tayanib xabar berishicha, avvalroq ertalabdan boshlab huquq-tartibot idoralari Robert Kocharyan va uning oila a'zolarining bir qator manzillarida tintuv o'tkazgani ma'lum qilingan edi.
Armaniston Korrupsiyaga qarshi kurash qo'mitasi o'z bayonotida korrupsiya xarakteridagi jinoyatlar bo'yicha tergov qilinayotgan jinoiy ish doirasida mamlakat bo'ylab bir necha o'nlab manzillarda tintuv va boshqa protsessual choralar amalga oshirilayotganini bildirdi. Qo'mita tergovning aniq yo'nalishi va hibsga olingan shaxslarga qo'yilgan ayblovlar haqida qo'shimcha ma'lumot bermadi.
Ertalab Robert Kocharyanning o'g'li, parlamentdagi muxolifatchi “Armaniston” fraksiyasi deputati Levon Kocharyanning uyiga ham huquq-tartibot xodimlari kirib, u yerda tintuv o'tkazgani haqida xabar tarqaldi. Armaniston OAVlari ushbu operatsiyada niqobli xodimlar ishtirok etganini bildirdi.
Keyinroq Levon Kocharyanning ham Milliy xavfsizlik xizmatiga olib ketilgani haqida ma'lumotlar tarqaldi. Uning uyida o'tkazilgan tintuv qaysi jinoiy ish doirasida o'tkazilgani haqida rasmiy idoralar qo'shimcha tafsilotlarni oshkor qilmadi.
Kocharyan oilasi bilan bog'liq ob'ektlarda ham huquq-tartibot choralari o'tkazilgani aytilmoqda. Armaniston matbuotining xabariga ko'ra, oilaga tegishli “Toyota” kompaniyasining Yerevandagi ofisi muhrlangan, shuningdek, “Orange Fitness” sport majmuasida tergov va protsessual choralar amalga oshirilgan.
