Eron Islom inqilobi posbonlari korpusi (SEPAH) Hormuz boʻgʻozidagi vaziyat boʻyicha bayonot berib, boʻgʻoz ustidan toʻliq nazorat Eron qoʻlida ekanligini maʼlum qildi.
Modern.az xabar berishicha, SEPAH bayonotida koʻrfazda qarshi tomonga tegishli harbiy kemalar qolmagani, ularning kamida 400 kilometr orqaga chekingani iddao qilingan.
SEPAH maʼlumotlariga koʻra, Hormuz boʻgʻozi suvlari va olingan daromadlar boʻyicha Ummon bilan maʼlum kelishuvlarga erishilgan.
Maʼlum qilinishicha, Eron AQSh Tehron shartlarini qabul qilsa va oʻzaro anglashuv memorandumiga qaytsa, Hormuz boʻgʻozini maʼlum doiralar ichida ochishga tayyor.
SEPAH taʼkidlaganidek, agar AQSh bu shartlarni qabul qilmasa, boʻgʻoz butunlay yopiq qoladi.
Eron tomonining bayonotida ushbu memorandumning aniq shartlari va boʻgʻozni qaysi doirada ochish mumkinligi haqida qoʻshimcha tafsilotlar oshkor etilmagan.
