Amerikalik milliarder va tadbirkor Ilon Mask dunyoda tug'ilish darajasining pasayishi insoniyat kelajagi uchun jiddiy xavf tug'dirayotganini ma'lum qildi. Modern.az xabar berishicha, u bu haqda "X"da yozgan.
"Insoniyat yo'q bo'lib bormoqda", - deb yozgan Mask.
U bu fikrni Singapurda tug'ilish darajasining keskin pasayishi haqidagi xabarni sharhlar ekan, bildirdi. "Freeze" nomli X foydalanuvchisi mamlakatdagi demografik vaziyatga e'tibor qaratib, 2025-yilda umumiy tug'ilish koeffitsiyenti rekord darajada - 0,87 bolagacha pasayganini yozgan.
Singapurning rasmiy ma'lumotlariga ko'ra, mamlakatda 2025-yil uchun dastlabki umumiy tug'ilish koeffitsiyenti haqiqatan ham 0,87 ni tashkil etgan. Bu ko'rsatkich 2024-yildagi 0,97 dan ham past.
Umumiy tug'ilish koeffitsiyenti bir ayolning reproduktiv yoshlari davomida mavjud tug'ilish darajalari o'zgarmagan taqdirda dunyoga keltiradigan o'rtacha bolalar sonini ifodalaydi. Aholining oddiy takror ishlab chiqarilishi uchun odatda taxminan 2,1 darajasi talab qilinadi.
Singapur hukumati tug'ilish darajasini oshirish maqsadida oilalarga moliyaviy yordam, bolaga qarash ta'tillari kengaytirilishi, uy-joy imkoniyatlari oshirilishi va bolalar parvarishi xizmatlariga subsidiyalar kabi chora-tadbirlarni amalga oshirmoqda. Mamlakat rasmiylari esa past tug'ilish darajasini uzoq muddatli demografik muammo deb baholaydilar.
Mask avvalroq ham past tug'ilish darajasini insoniyat uchun uzoq muddatli xavflardan biri deb baholagan edi.
