Armaniston Bosh vaziri Nikol Pashinyan mamlakatda ishlab chiqarilgan konyakni nomlash bo‘yicha diqqatga sazovor bayonot berdi.
Modern.az xabar berishicha, Pashinyan bu haqda bugun Armaniston parlamentida hukumatning kelgusi besh yillik dasturini muhokama qilish chog‘ida gapirgan.
Bosh vazirning ta’kidlashicha, xalqaro standartlarga ko‘ra, “konyak” atamasi Fransiyaning ma’lum bir mintaqasida mahalliy uzumdan ishlab chiqarilgan ichimlikni anglatadi:
"Shu nuqtai nazardan, Armanistonda ishlab chiqarilgan alkogolli ichimlikni “konyak” deb nomlash masalasi qayta ko‘rib chiqilishi kerak. Mamlakatda mahsulot sifatini nazorat qilish uchun zamonaviy laboratoriyalar yaratish muhim. Biroq, uning fikricha, ba’zi masalalarni hal qilish uchun laboratoriyalarga ehtiyoj yo‘q. Dunyoda bizning alkogolli ichimligimiz haqida fikr bildirib, uning konyak ekanligini tasdiqlaydigan bunday laboratoriya yo‘q. Chunki “konyak” Fransiyaning tegishli mintaqasida mahalliy uzumdan ishlab chiqarilgan alkogolli ichimlikni anglatadi”.
Armaniston Bosh vaziri “konyak” nomidan voz kechish masalasi mamlakatda jiddiy muhokamalarga sabab bo‘lganini ham aytdi:
“Xo‘sh, biz bu nomdan voz kechishimiz kerakmi yoki yo‘qmi? Men buni hukumatda muhokama qilganimda, muxolifat doiralari hukumat go‘yoki navbatdagi milliy boylikdan voz kechmoqchi ekanligini aytishni boshlaydilar. Men buni tushunmayapman. Agar muxolifat rozi bo‘lsa, biz tegishli arman alkogolli ichimligi uchun “konyak” so‘zini ishlatishni taqiqlovchi qonun loyihasini tayyorlashimiz mumkin”.
