Azərbaycan Yazıçılar Birliyinin tabeliyində olan iki mətbu orqan – “Ədəbiyyat qəzeti” və “Ulduz” jurnalında yeni təyinatlar olub. Təyinatlara əsasən Elçin Hüseyinbəyli və Qulu Ağsəs baş redaktor vəzifələrini tutublar.
Ötən gün AYB sədri Anar “Ədəbiyyat qəzeti”nin yeni baş redaktorunu qəzetin kollektivinə təqdim edib. Təqdimetmə mərasimində Anarla bərabər, birinci katib Fikrət Qoca, katiblər Çingiz Abdullayev, Arif Əmrahoğlu, Rəşad Məcid, mətbuat xidmətinin rəhbəri Xəyal Rza iştirak edib.
Modern.az-ın AYB-in mətbuat xidmətinə əsasən verdiyi məlumata görə, AYB sədri Anar çıxış edərək keçmiş baş redaktor Ayaz Vəfalının səhhəti ilə əlaqədar öz ərizəsilə işdən azad olunduğunu və daha sonra katibliyin iclasında yekdilliklə Elçin Hüseynbəylinin baş redaktor təyin edildiyini vurğulayıb.
Elçin Hüseynbəylinin özü Modern.az-a açıqlamasında yeni işi və planları barəsində Yazıçılar Birliyinin Natəvan klubunda keçirəcəyi brifinqdə məlumat verəcəyini bildirib. Brifinqin keçirilmə vaxtına gəldikdə isə E. Hüseyinbəyli bunları qeyd edib: “Əvvəlcə birinci günə planlaşdırmışdıq. Amma sonra redaksiyanın və digər problemlərin olması səbəbindən gecikdi. İnanmıram ki, bu yaxında olsun”.
Elmin Nuri
