Միավորված ազգերի կազմակերպության Գլխավոր ասամբլեան աջակցել է աշխարհի քարտեզի օգտագործման ընդլայնմանը, որն ավելի ճշգրիտ է արտացոլում մայրցամաքների և երկրների իրական չափերը:
Modern.az-ը հայտնում է, որ սեպտեմբերի 4-ին կայացած քվեարկության ժամանակ 164 երկիր կողմ է քվեարկել համապատասխան բանաձևին։ ԱՄՆ-ը դեմ է քվեարկել փաստաթղթին, իսկ 6 երկիր ձեռնպահ է մնացել։
Խոսքը Մերկատորի պրոյեկցիայի՝ 16-րդ դարից լայնորեն օգտագործվող քարտեզի փոխարինման մասին է «Equal Earth» քարտեզով։ Մերկատորի քարտեզը բևեռներին մոտ տարածքները ցույց է տալիս իրական չափերից ավելի մեծ, իսկ հասարակածին մոտ տարածքները, հատկապես Աֆրիկան, ավելի փոքր։
Օրինակ, ավանդական քարտեզի վրա Գրենլանդիան մոտավորապես նույն չափի է թվում, ինչ Աֆրիկան։ Իրականում Աֆրիկան մոտ 14 անգամ մեծ է Գրենլանդիայից։
«Equal Earth» պրոյեկցիայում Աֆրիկան, Հարավային Ամերիկան և հասարակածային այլ տարածքներ ցուցադրվում են իրենց իրական չափերին ավելի համապատասխան։ Ռուսաստանը, Կանադան, ԱՄՆ-ը և եվրոպական երկրներն ավելի փոքր են թվում՝ համեմատած Մերկատորի քարտեզի հետ։
Նոր քարտեզը չի փոխում երկրների քաղաքական սահմաններն ու տարածքները։ Փոփոխությունը վերաբերում է միայն Երկրագնդի հարթության վրա պատկերման եղանակին։
Բանաձևը պարտադիր բնույթ չի կրում։ Փաստաթուղթը կոչ է անում պետություններին, կրթական հաստատություններին, միջազգային կազմակերպություններին, լրատվամիջոցներին և տեխնոլոգիական ընկերություններին օգտագործել քարտեզներ, որոնք ճիշտ են ցույց տալիս տարածքները։
«Equal Earth» պրոյեկցիան նոր չի մշակվել։ Քարտեզը ստեղծվել է 2018 թվականին, իսկ ՄԱԿ-ը հիմա է աջակցել դրա օգտագործման ընդլայնմանը։
