Mansur Piriyev
Kimdir adi vətəndaş ?
Vətəndaşlığı olan istənilən bir şəxs adi vətəndaş hesab olunur.
Göründüyü kimi, çox da çətin deyilmiş bu sualın cavabı.
Ancaq ilk baxışda sadə görünən bu söz birləşməsi əslində çox da adi, sadə olmayan dərin məna yükünü daşıyır.
Adi vətəndaş həm də vətənini sevən, adi həyat tərzi yaşayan, günləri bir-birindən çox da fərqlənməyən, oğlunu hərbi xidmətə fəxrlə yola salmağı bacaran, hər addımında ətrafın nə düşünəcəyini nəzərə alıb insanlardan seçilməyə çalışmayan, adət-ənənələri qanun hesab edən, ailə münasibətlərini ata-babsından gördüyü kimi yaşayan və idarə edən, gündəlik ailə-məişət qayğılarından kənara çıxmayan, qohum-əqrabadan başqa heç kimin tanımadığı – heç kimin maraqlanmadığı, loru dildə danışan, hirsləndikdə sakitləşənədək ətrafdakılara ziyan verməmək üçün hirsini içində boğan və bu mümkün olmadıqda məişət söyüşləri ilə təskinlik tapan, heç kimə ziyan vurmayan və ən əsası ucuz yatağına-yorğan döşəyinə girərkən rahat yatmağı bacaran insandır ADİ VƏTƏNDAŞ!
Demək ki, adi vətəndaş olmaq o qədər də asan deyilmiş.
Türkiyəli şair Hamdi Işığın şeirində deyildiyi kimi...
Mən adi vətəndaş olmaq istəyirəm
Nə bəzəkli cümlələr nə də hədiyyələr
Heç birini istəmirəm
Sıravi insan olmaq istəyirəm
İmtiyaz mı? nə imtiyazı
Onsuzda hamımız öləcəyik
Mən adi insanarın yaşadığı bir şəhərdə
Sıravi bir insan olmak istəyirəm
Sevgi isə sevgi, pul isə pul
Bunların hamısı sıradan olsun
Nə helə alovlu sevişmələr
Nə də bir çuval pul istəyirəm
Sıravi insan olmak istəyirəm
Mətbuatda yazılmasın adım
Hətta heç kim tanımasın məni
Nə var-dövlət nə nə cah-cəlal...
Heç birini istəmirəm
Gəlirim lap minimum əmək haqqı olsun
Dünyada hər kəs kimi sıravi yaşamaq istəyirəm
Möhtərəm biri olmaq vecimə də deyil
Mən sıravi insan olmaq istəyirəm.
(tərcümə. M.P.)
