QABİL
Qutqaşenə gedəndə
Boynuma qol saldı o.
Qahirəyə gedəndə
Ürəyimdən çaldı o.
Kaş ki, yaxın olaydı
Mənə uzaq səfərdə...
Adam yaxın mənzilə
Elə-belə gedər də.
Qutqaşenə gedəndə:
Gəl, görüşək – söylədi.
Qahirəyə gedəndə:
Məndən əl çək – söylədi.
Qutqaşenə gedəndə
Kaş ki, dönəydi üzü
Qahirəyə peşiman
Göndərməyəydi bizi...
Qutqaşenə gedəndə
Mənim qəlbim quş oldu.
Qahirəyə gedəndə
Onun qəlbi daş oldu.
O gözlərdə, gözlərdə
Neçin yad oldum belə?
Xoşbəxt o adamdı ki
İstədiyi vaxt ölə...
Qutqaşenə gedəndə
Ruhum ulduzda, Ayda
Qahirəyə gedəndə
Ruhsuz bədəndi göydə,
Təyyarə qanadında
Göyə qalxmağa nə var –
Təyyarə ruh qaldırmaz,
Təyyarə yük qaldırar...
Qutqaşenə gedəndə
O qorudu qəlbimi
Ləl kimi, gövhər kimi.
Qahirəyə gedəndə
O sındırdı qəlbimi
Ucuz şüşələr kimi...
Quş sınıq qanadıyla
Yaxına bir cür çatar,
Uzağın qorxusu var
Ay allahsız ovçular!
Qaranlıq boşluqları
Təyyarə yarır gedir.
Türkiyə üzərindən
Misirə varır gedir.
Qutqaşenə gedəndə
Sevinc ilə qoşa mən...
Qahirəyə gedəndə
Qüssəylə baş-başa mən.
Sağ olsun sevinc-kədər
Tək deyiləm müxtəsər
Qutqaşenə gedəndə...
Qahirəyə gedəndə.
1973
GECƏYARI QAHİRƏNİN KÜÇƏLƏRİNDƏ
Bilsəydim ki, sən mənimlə barışacaqsan,
Bilsəydim ki, sən mənimlə görüşəcəksən
Kədər məni, qüssə məni çaşdırardımı,
Göz yaşlarım Nil çayını daşdırardımı
Gecəyarı Qahirənin küçələrində?!
Bilsəydim ki, ümidimiz üzülməyəcək,
Sənli... mənli... bu hicrana dözülməyəcək,
Vidalaşıb intizarlı günüm, ayımla
Səhraları oyadardım hay-harayımla,
Gecəyarı Qahirənin küçələrində.
Bilsəydim ki, saçlarıma qonan həsrəti
Yenə sənin öz əllərin arıdacaqdır...
Bilsəydim ki, ürəyimdə donan möhnəti
Yenə sənin öz əllərin əridəcəkdir.
Qəm ləşkəri heç üstümə yeriyərdimi,
Səmum yeli məni büküb bürüyərdimi
Gecəyarı Qahirənin küçələrində.
Bilsəydim ki, sən mənimsən, yenə mənimsən,
Bülbülləri geri dönmüş çöl-çəmənimsən.
Ehramları qaldırardım yeddinci qata,
Fir’onlar da mat qalardı həmin büsata
Gecəyarı Qahirənin küçələrində.
Bilsəydim ki, sənsizliyin ömrü gödəkmiş,
Ayrılığın bir ötəri acı küləkmiş,
Son baharı calamazdım mən ilk bahara,
Hicranımı tapşırardım qürbət diyara
Gecəyarı Qahirənin küçələrində.
1973