Qozogʻiston Prezidenti Qosim-Jomart Toqayev uzoq yillardan buyon asosiy maslahatchisi boʻlib ishlagan Yerlan Karinni vitse-prezident etib tayinladi.
Modern.az Reutersga tayanib xabar berishicha, bu lavozim mamlakatda bu yil qabul qilingan yangi Konstitutsiyaga asosan yaratilgan.
50 yoshli Yerlan Karin 2019-yildan buyon Toqayevning asosiy maslahatchisi lavozimida ishlaydi. U avvalroq terrorizmga qarshi kurash sohasida faoliyat yuritgan.
Qozogʻiston Oliy sudi 73 yoshli Toqayevning yangi Konstitutsiyaga asosan yana bir 7 yillik prezidentlik muddatiga nomzodligini ilgari surishi mumkinligiga qaror qildi. Toqayevning hozirgi prezidentlik muddati 2029-yilda tugaydi.
Toqayev shuningdek, Oljas Bektenovning bosh vazir lavozimiga qayta tayinlanishini taklif qildi. Bektenov 2024-yildan buyon Qozogʻiston hukumatiga rahbarlik qiladi. Har ikki tayinlov mamlakat parlamenti tomonidan tasdiqlangan.
