Moskvada oʻtkazilgan reyd chogʻida 140 ga yaqin migrant hibsga olindi.
Modern.az xabar berishicha, Rossiya Ichki ishlar vazirligi Migratsiya xizmati maʼlumotlariga koʻra, Moskva metrosida migratsiya qonunchiligini buzgan shaxslarni aniqlash maqsadida “eng yangi texnologiyalar”dan foydalanilgan holda reyd oʻtkazilgan.
Vazirlik maʼlumotida aytilishicha, operatsiya Moskva metrosi stansiyalaridan birida oʻtkazilgan. Reydda IIV Migratsiya xizmati bilan bir qatorda Migratsiya masalalari boʻyicha markaz xodimlari, Moskva va Moskva viloyati politsiyasi, jumladan, Moskva Metropolitenidagi Ichki ishlar boshqarmasi xodimlari ishtirok etgan.
“Bir necha soat ichida huquq-tartibot idoralari migratsiya qonunchiligini buzgan holda mamlakatda boʻlgan va nazoratdagi shaxslar roʻyxatiga kiritilgan 140 ga yaqin chet el fuqarosini aniqladi”, – deyiladi xabarda.
Maʼlum qilinishicha, hibsga olinganlarning barchasi politsiya boʻlimlariga olib ketilgan. Ularning Rossiyadan deportatsiya qilinishi va keyinchalik mamlakatga kirishlari taqiqlanishi aytilgan.
Migratsiya xizmati bunday tadbirlar muntazam ravishda, jumladan, Rossiyaning boshqa hududlarida ham oʻtkazilishini maʼlum qildi.
