Milli Məclisin Səhiyyə komitəsinin sədri, akademik Əhliman Əmiraslanov Sabirabad rayonunda seçiciləri qəbul edib.
Modern.az xəbər verir ki, Sabirabad rayon Heydər Əliyev Mərkəzində, xüsusi karantin rejiminin tələblərinə uyğun sosial məsafə nəzərə alınmaqla və qoruyucu maskalardan istifadə etməklə təşkil olunmuş qəbulda rayon İcra başçısının müavini H. Həsənov və YAP Sabirabad rayon təşkilatının sədri M. Ağayeva da iştirak edib.
Qəbul zamanı Əhliman Əmiraslanov bu gün dünyada qlobal problem olan koronavirus pandemiyasının ölkəmizdə yayılmasının qarşısının alınması, onun fəsadlarının aradan qaldırılması, xalqımızın sağlamlığının qorunması və əhalinin sosial müdafiəsinin gücləndirilməsi istiqamətlərində dövlət tərəfindən bütün zəruri tədbirlərin görüldüyünü qeyd edib. Millət vəkili hazırki pandemiya dövründə karantin rejiminin bütün tələblərinə vətəndaşların əməl etməsinin vacibliyini bildirib.
Qəbula gələn 65 saylı Saaatlı-Sabirabad-Kürdəmir seçki dairəsinə aid olan yaşayış məntəqələrinin sakinləri bu pandemiya dövründə də seçicilərini bir an da olsun diqqətsiz qoymayan deputatlarına minnətdarlıq ifadə etdilər. Sonra isə sakinlər onları narahat edən və əsasən, bəzi sosial yönümlü məsələlərdən ibarət olan problemlərini səsləndiriblər.
Əhliman Əmiraslanov sakinləri narahat edən problemlərin həlli istiqamətində müvafiq tədbirlərin görüləcəyini seçicilərin diqqətinə çatdırıb.
