Bu yazını düz 5il bundan öncə - elə bu ərəfədə yazmaq fikrindəydim. O zaman da şəxsiyyətinə, intellektinə, insanpərvərliyinə, ziyalılığına böyük hörmət və ehtiram bəslədiyim Rəbiyyət xanımın yubiley doğum günüydü. Amma müəyyən səbəblər üzündən o vaxt Rəbiyyət xanımla bağlı nəzərdə tutduğum yubiley yazısını hazırlayıb ərsəyə gətirə bilmədim. Görünür, atalar məsəlində deyildiyi kimi, qismət bu günəymiş.
Bu il - konkret desək iyulun 4-ü millət vəkili Rəbiyyət Aslanovanın doğum günüdür, yubileyidir. Bəri-başdan deyim ki, Rəbiyyət xanım haqqında yazı yazmaq həm asandır, həm də çətin. Asandır ona görə ki, bu insan həmişə təvazökarlığı, səmimiliyi, demokratikliyi, çoxlarının həsəd aparacağı tolerantlığı, ziyalılığı, sadələyi, ən əsası insanpərvərliyi ilə seçilir. Rəbiyyət xanım insanlara heç zaman hansısa mənsubiyyətinə, sosial durumuna, digər məqamlarına görə deyil, məhz insan olmasına görə önəm verib və bu gün də belədir. Rəbiyyət xanım bir parlamentari, qanunverici orqanın komitə sədri kimi hər zaman ona üz tutub pənah gətirən, ağız açan, ona ərizə və şikayət məktubları ilə müraciət edən insanlara təmənnasız kömək etməyə çalışıb və əksər hallarda da buna nail olmağı bacara bilib. Hər zaman fəaliyyətində başlıca amil olan insan amilinə böyük dəyər verib və verməkdədir… Bu baxımdan Rəbiyyət xanım haqqında yazı yazmaq üçün necə deyərlər, saatlarla fikirləməyə, dağa-daşa düşməyə ehtiyac qalmır. Sözlər, cümlələr sanki öz-özünə ardı-ardına gəlir. Özü də səmimi sözlər, səmimi fikirlər. səmimi cümlələr…
Rəbiyyət xanım haqqında yazmaq çətindir ona görə ki, bunun özü insandan ilk öncə böyük məsuliyyət tələb edir. Hər zaman hamımızdan biri olan Rəbiyyət xanım müasir Azərbaycan ziyalılarının və ziyalılığının ən parlaq nümayəndələrindəndir. O çoxlarından fərqli olaraq, siyasətə elmdən gəlib və bununla da siyasətə bir növ elmilik, intellektuallıq, ziyalılıq gətirib, yaxud, gətirənlərdən biridir. Rəbiyyət xanım Azərbaycan siyasətinin belə demək mümkünsə, ağyaxalılılarındandır. Rəbiyyət xanımın nə insan leksikonunda, nə də siyasi leksikonunda təhqir, böhtan, qarayaxma, aşağılama yoxdur. Rəbiyyət xanım hər zaman, hətta, özünə ünvanlanan haqsız tənqidlərə, təhqirlərə belə öz ziyalı düşüncəsi ilə cavab verib, kimlərisə dəbdə olan məhkəməylə - filanla hədələməyb. Əksinə, belə “düşüncə sahiblərini” öz vicdanlarının mühakiməsinə verib, yəni, bütün anlarında öz ziyalılığını, xanıımlığını, səviyyəsini qoruyub-saxlayıb. Ona görə indi belə bir insan haqqıında yazı yazmaq yuxarıda qeyd etdiyim ki, asan, sıradan bir məsələ deyil…
Rəbiyyət xanım haqqında cox sözlər yazmaq olar, xüsusilə də bu əlamətdar yubiley günündə. O həqiqətən də bütün xoş sözlərə layiq ziyalı, millətin vəkili, siyasətçi, ən əsası dəyərli bir insan – ana, ailə başçısıdır. Ancaq hesab edirəm ki, Rəbiyyət xanımın bu sözlərə də bir o qədər ehtiyacı yoxdur. O öz insani və siyası davranışı, fəaliyyəti ilə öz sözünü deyib, öz imzasını qoyub, öz qiymətini alıb və bu gün də belədir, bundan sonra da belə olacaq.
Sadəcə, növbəti doğum günü - yubileyi münasibətilə Rəbiyyət xanımı təbrik edir, ona elmi, siyası fəaliyyətində yeni-yeni nailiyyətlər, şəxsi-ailə həyatında saya-hesaba gəlməz uğurlar arzulayırıq. Yubiley doğum gününüz mübarək olsun hamımızın əzizi Rəbiyyət xanım!
