“Eurovision-2012” ərəfəsində belə bir məlumat yayıldı ki, Azərbaycana gələn bir qrup alman turist maraqlı bir aksiya təşkil edib. Həmin məlumata görə, səyahətlərini Qobustanda yekunlaşdıran 666 alman səyyah özlərinin sürüb gətirdikləri 240 ədəd şəxsi avtomobillərini qaçqın və məcburi köçkünlərə bağışlayaraq, mahnı müsabiqəsi bitəndən sonra geriyə təyyarə ilə qayıdacaqlar. Xəbər “Xəzər” telekanalında da yayımlandı və hətta müxbirlər Bakıda olan alman səyyahlardan müsahibə də təqdim etdilər. “Xəzər”ə müsahibə verən alman turistlər bildirirdilər ki, bəli, sürüb gətirdikləri avtomobilləri qaçqın və məcburi köçkünlərə bağışlayıb gedəcəklər.
Qeyd edək ki, onlar “Allgeau-Orient” adlı avtorallinin iştirakçıları idi. Ralliyə 20 ölkədən 111 komanda (355 avtomobil və 666 iştirakçı) qoşulub ki, onlar Almaniyanın cənubundakı Oberstaufen şəhərindən Azərbaycan paytaxtı Bakıya (9000 km uzunluğunda) doğru dünyanın ən böyük avtomobil yürüşü ediblər.
Bəs alman turistlərin qaçqın və məcburi köçkünlərə bağışlamaq istədikləri avtomobillər necə, nə zaman, harada bölüşdürüləcək? Modern.az-ın əməkdaşı bu suallara cavab tapmaq istəyib...
Maraqlıdır ki, “Eurovision-2012” Mahnı Müsabiqəsində Azərbaycan nümayəndə heyətinin ictimaiyyətlə əlaqələr və kommunikasiya rəhbəri Tahir Məmmədov bu məlumatı şayiə adlandırıb. Məsləhət görüb ki, belə informasiyalara heç kim inanmasın. “Belə bir məlumat bizdə yoxdur. Ümumiyyətlə, “Eurovision 2012” Təşkilat Komitəsinə bu haqda məlumat daxil olmayıb”.
