Bir zamanlar Azərbaycan Milli Məclisinin (keçmiş Ali Sovetin) iclas salonunda deputatların çıxış etməsi üçün mikrofonlar qoyulmuşdu. Oturacaqların arasında quraşdırılmış və nömrələnmiş mikrofonlardan ən məşhuru “4-cü mikrofon” idi. (Sonradan “4-cü mikrofon”un “şərəfinə” eyni adlı qəzet və TV proqram da açılmışdı). “4-cü mikrofon”u populyarlaşdıran isə oradan edilən çıxışlar idi. Sovet dövründə “yekdilliyə” alışmış Azərbaycan insanı, fərqli fikri bu mikrofondan eşitməyə başlamışdı.
Modern.az-ın “Bir şəklin tarixcəsi” layihəsində bu gün təqdim etdiyi fotoşəkil “4-cü mikrofon” ətrafında yaranan böyük növbələrdən bir epizodu nümayiş etdirir.
Şəkildən də göründüyü kimi, çağdaş tariximizdən canlı olaraq tanıdığımız siyasilər “4-cü mikofon” ətrafına topalanaraq çıxış üçün növbə gözləyirlər.
Şəkildə öndə oturmuş deputat Mixail Zabelindir. Göründüyü kimi cənab Zabelin elə o vaxtdan parlamentdə çıxış etmək həvəsində olmayıb. Bəlkə elə buna görədir ki, şəkildə görünən o zamankı deputatlardan yalnız Mixail Zabelin öz kreslosunu o zamandan qoruyub saxlaya bilib. Və ya belə də demək olar ki, seçiciləri onun parlamentin iclaslarında birmənalı şəkildə susmasını yüksək qiymətləndirərək, hər dəfə ona səs verirlər.
Şəkildəki eks-deputatlardan hazırda deputat olmaq istəyənlər Sülhəddin Əkbərlə Tahir Kərimlidir. Görəsən, Mixail Zabelinin “Susmaq qızıldır” prinsipi onların deputat olmasına nə dərəcədə kömək ola bilər...
(Şəkillə bağlı maraqlı şərhlərinizi gözləyirik)
Modern.az
