Müsavat Partiyasının mayın 4-də keçiriləcək qurultayında başqanlığa namizədlərdən biri İsa Qəmbər olacaq. İsa Qəmbər bu haqda qərarını qurultaya hazırlıq üzrə Təşkilat Komitəsinin aprelin 29-da keçirilən iclasında açıqlayıb.
Lakin onun namizədliyi Müsavat partiyasının bəzi üzvləri, eləcə də bir sıra siyasətçilər tərəfindən birmənalı qarşılanmayıb. Belə ki, o, bundan öncə 22 il Müsavat Partiyasının başqanı olub.
Modern.az məsələ ilə əlaqədar sabiq müsavatçılarla əlaqə saxlayıb.
Saytımıza açıqlamasında bir vaxtlar Müsavat Partiyasının Gənclər Təşkilatının sədri olmuş Ağ Partiyası sədri Tural Abbaslı bildirib ki, İsa Qəmbərin namizədliyinin Putin-Medvedev modelinin təzahürüdür:
"Müsavat Partiyasının 4 may qurultayı görünür, sadəcə bəzi jurnalist dostlarımıza maraqlıdır. Cəmiyyətdə Musavat Partiyasında qurultay var-yox, kim namizəddi kimi məsələlər maraqlı deyil. Şəxsən mənə də maraqlı deyil. Amma siyasi keçmişimiz var deyə cavab verirəm. Məsəl var ki, insanlar döyüşə-döyüşə sonda döyüşdükləri əjdahaya çevirilir. Bu insanlar ömürboyu Putini tənqid ediblər. Dünyada Putin-Medvedev konfiqurasiyası sayılan modeli icra edirlər. Kimin başını aldadıb, yola vermək istəyirlər özləri bilərlər. Bunun adı Putin-Medvedev konfiqurasiyasıdır. Özlər bilərlər, xeyirli olsun!"
Müsavat Partiyasının daha bir keçmiş üzvü Səxavət Əlisoy isə vurğulayıb ki, İsa Qəmbər Müsavat Partiyasını xilas etmək istəyir:
"İsa Qəmbər Müsavat Partiyasının üzvü kimi namizədliyini irəli sürə bilər. Burada sual doğuran başqa məsələ var. İsa Qəmbər nə üçün indi Müsavat Partiyasının başqanı olmaq istəyir. Əslində, o, Müsavat Partiyasını xilas etmək istəyir. 2014-cü ildə mən "Arif Hacılıya başqanlığı vermək Müsavat Partiyasını dərnəyə çevirməkdir" deyəndə düşmən mövqe sərgiləyirdilər. Bir az uzaqgörən olsaydılar, o boyda Müsavat Partiyası bugünkü səviyyəyə düşməzdi. İsa Qəmbər yaxşı bilir ki, Arif Hacılının dəstəsi elə adamı namizəd kimi irəli sürəcək ki, hətta Müsavat Partiyası tarixdən silinmək təhlükəsi ilə üz-üzə qalacaq. Müsavat Partiyasının təşəkkül tapmasında, formalaşmasında yüzlərlə yox, minlərlə insanın əməyi var. O cümlədən, az-çox mənim də əməyi olub. Partiyanın göz qabağında itib yox olması adamı ağrıdır. İsa Qəmbərin Müsavat Partiyasının tamamən məhv olmasının qarşısını almaq istəyini müsbət qarşılayıram. Amma 2014-cü ilə qədərki Müsavat Partiyasının olması bir ömür istəyir. Buna 15-20 il enerji qoymaq lazımdır ki, partiya 2003-cü ildəki vəziyyətinə 50 faiz də olsa, çatsın. Böyük səhvlər olub. Partiya sədrləri, İsa Qəmbər də səhvi etiraf etmək iqtidarında deyil. Onlar özlərini siyasi peyğəmbər hesab edirlər. Hazırkı durum da bunun nəticəsidir. Tək Müsavat Partiyasına yox, digər siyasi partiyalarına baxın. Acınacaqlı, reanimasiyalıq durumdadılar".
