Azərbaycanda səfər olan Rusiya Liberal-Demokrat Partiyasının sədri, Rusiya Federasiyası Dövlət Şurasının üzvü, Dövlət Dumasının deputatı, qalmaqallı siyasi imicə malik Vladimir Jirinovski bu gün prezident İlham Əluyevlə görüşün ardından Bakıdakı 23 saylı orta məktəbə baş çəkib.
Modern.az saytının məlumatına görə, daha sonra Vladimir Jirinovski Bakı Slavyan Universitetinə gəlib. Onu bu görüşlərdə Milli Məclisin deputatı Səməd Seyidov müşayiət edib.
Şagirdlərdən biri V. Jirinovskiyə onun öz portretini hədiyyə edib.
V. Jirinovski jurnalistlərə açıqlamasında Azərbaycanda çox yaxşı qarşılandığını, burada insanların rus dilində çox yaxşı danışdıqlarını bildirib. O, Azərbaycanda barəsində mənfi fikir formalaşmasına və hazırda Azərbaycan barədə müsbət fikirlər söyləməsinin səbəblərinə aydınlıq gətirib:
“Bu, yanlış anlaşılmazlıqla bağlı idi. Müəyyən situasiya ilə bağlı söylənən fikir sonradan xalqa, ölkəyə aid edilir. Məsələn, hazırda Donbassa görə Kiyevdə mənə nifrət edirlər. Haradasa nə isə bir hadisə baş verəndə, biz onu qiymətləndiririk. Sonra da hər hansı situasiya ilə bağlı qiymətləndirməni o ölkə və xalqla bağlayırlar. Nəticədə yanlış anlaşılma olur”.
