NATO oʻnlab yillar ichida birinchi marta AQSh ishtirokisiz Rossiya yadroviy suv osti kemalarini qidirish boʻyicha keng koʻlamli mashgʻulotlar oʻtkazdi.
Modern.az xabar berishicha, bu haqda “Politico” yozgan.
Nashrning yozishicha, Islandiya qirgʻoqlari yaqinida Yevropa davlatlari va Kanadaga tegishli harbiy kemalar va aviatsiya kuchlari yadro quroli olib yurishi mumkin boʻlgan Rossiya suv osti kemalarini aniqlash boʻyicha mashgʻulotlar oʻtkazgan.
Mashgʻulotlar davomida suv osti kemalarining Grenlandiya, Islandiya va Buyuk Britaniya oʻrtasidagi hududdan oʻtib, Atlantika okeaniga chiqishining oldini olish ssenariysi boʻyicha tayyorgarlik koʻrildi.
Ilgari har yili oʻtkaziladigan bu mashgʻulotlarda AQSh asosiy rol oʻynagan. Ammo bu safar birinchi marta Amerika harbiy kemalari va samolyotlari mashgʻulotlarda ishtirok etmadi. Nashr maʼlumotlariga koʻra, AQSh Harbiy-dengiz kuchlarining katta qismi hozirda Yaqin Sharq va Karib dengizi mintaqasida joylashgan.
Taʼkidlash joizki, NATO shu tariqa Shimoliy Atlantikada ortib borayotgan Rossiya tahdidi fonida AQSh yetakchiligisiz mintaqa mudofaasini taʼminlash imkoniyatlarini sinovdan oʻtkazmoqda.
