Tehron Armaniston Bosh vaziri Nikol Pashinyanga "Tramp yo'li" (TRIPP) qurilishi bo'yicha kutilmaganda yangi va qattiq shartlar qo'ydi.
Modern.az xabar berishicha, bu haqda Armaniston OAVlari ma'lumot tarqatgan.
Bildirilishicha, Eron hukumati TRIPP loyihasining xavfsizligini yo Armaniston Qurolli Kuchlari, yo allaqachon Armaniston hududida joylashgan uchinchi davlatning qurolli kuchlari ta'minlashini talab qilgan. Bu yerda Rossiya Qurolli Kuchlari nazarda tutilayotgani taxmin qilinmoqda.
Ma'lumotlarga ko'ra, Tehron shu orqali AQSh harbiylarining o'z chegaralari yaqinida paydo bo'lishining oldini olishga harakat qilmoqda. Aks holda, tobora keskinlashib borayotgan mojaro sharoitida Eron tomoni AQSh harbiylarini qonuniy nishon deb hisoblashi mumkin.
Bu esa shundoq ham "falaj holatida" bo'lgan va Yerevan tashqi siyosatining asosiy loyihasi hisoblangan tashabbusni amalga oshirishni yanada qiyinlashtiradi.
