Rossiya AQShning oʻrta va uzoq masofali raketa komplekslarini Norvegiyada joylashtirishini NATOning barqarorlikni keskin buzuvchi qadamlari qatoriga kiritadi.
Modern.az xabar berishicha, bu haqda Rossiya Tashqi ishlar vazirligining rasmiy vakili Mariya Zaxarova maʼlum qildi.
Uning soʻzlariga koʻra, yer usti raketa komplekslarining Norvegiyada joylashtirilishi NATOning Rossiya hududining chuqurligiga zarbalar berish imkoniyatlarini yaratish niyatini namoyish etadi.
Zaxarova bu qurilmalar uzoq masofali raketalarni ham uchira olishini daʼvo qildi. Rossiya TIV rasmiysining fikricha, bunday raketalarni joylashtirish NATOga Moskva hamda Rossiyaning Yevropa qismining muhim bir boʻlimini nishonga olish imkoniyatini berishi mumkin.
Qayd etish joizki, AQSh bundan avval Norvegiyaga oʻrta va yaqin masofali raketalar uchun yangi uchirish qurilmasini joylashtirgan. Shu bilan Norvegiya Yevropada bu turdagi AQSh tizimlari olib kelingan ikkinchi davlat boʻldi.
Maʼlumotlarga koʻra, turli xil raketalarni, jumladan, “Tomahawk” qanotli raketalarini uchirish imkoniyatiga ega “Mk 70” kompleksidan soʻz bormoqda. Tizim Norvegiyaga AQSh, Buyuk Britaniya va Norvegiyaning birgalikdagi harbiy mashgʻulotlari doirasida olib kelingan.
