Birlashgan Millatlar Tashkiloti Bosh Assambleyasi qit'alar va davlatlarning haqiqiy o'lchamlarini aniqroq aks ettiruvchi dunyo xaritasidan foydalanishni kengaytirishni qo'llab-quvvatladi.
Modern.az xabar berishicha, 4-sentabr kuni bo'lib o'tgan ovoz berishda 164 davlat tegishli rezolyutsiya foydasiga ovoz berdi. AQSh hujjatga qarshi ovoz berdi, 6 davlat betaraf qoldi.
Gap XVI asrdan beri keng qo'llanilgan Merkator proyeksiyasini “Equal Earth” xaritasi bilan almashtirish haqida ketmoqda. Merkator xaritasi qutblarga yaqin hududlarni haqiqiy o'lchamlaridan kattaroq, ekvatorga yaqin hududlarni, xususan, Afrikani esa kichikroq ko'rsatadi.
Masalan, an'anaviy xaritada Grenlandiya Afrika bilan deyarli bir xil kattalikda ko'rinadi. Aslida esa Afrika Grenlandiyadan taxminan 14 barobar kattaroqdir.
“Equal Earth” proyeksiyasida Afrika, Janubiy Amerika va boshqa ekvatorial hududlar real o'lchamlariga ko'proq mos keladigan tarzda ko'rsatilgan. Rossiya, Kanada, AQSh va Yevropa davlatlari esa Merkator xaritasi bilan solishtirganda kichikroq ko'rinadi.
Yangi xarita davlatlarning siyosiy chegaralari va hududlarini o'zgartirmaydi. O'zgarish faqat Yer sharining tekislikda tasvirlash usuliga tegishli.
Rezolyutsiya majburiy xarakterga ega emas. Hujjat davlatlarni, ta'lim muassasalarini, xalqaro tashkilotlarni, media va texnologiya kompaniyalarini hududlarni to'g'ri ko'rsatadigan xaritalardan foydalanishga chaqiradi.
“Equal Earth” proyeksiyasi yangi ishlab chiqilmagan. Xarita 2018-yilda yaratilgan, BMT esa endi uning foydalanishini kengaytirishni qo'llab-quvvatladi.
