Rossiya fuqarolik yuk kemalaridan Afrikaga harbiy texnika va maxsus xizmat xodimlarini yuborish uchun foydalanayotgani iddao qilinmoqda.
Modern.az xabar berishicha, bu haqda “Dosye” markazi, “Süddeutsche Zeitung” va boshqa Yevropa ommaviy axborot vositalarining qoʻshma tadqiqotida aytiladi.
Jurnalistlar Rossiya Mudofaa vazirligining “Afrika korpusi” uchun texnika tashuvchi uchta ro-ro kemasida va toʻrtta quruq yuk kemasida 28 nafar shubhali yoʻlovchini aniqlaganlar.
Tadqiqot mualliflarining taʼkidlashicha, ular tekshirgan maʼlumotlar bazalarida bu shaxslar haqida yozuvlar topilmagan. Ularning biometrik boʻlmagan tashqi pasportlari ketma-ket raqamlar bilan, ommaviy ravishda berilganligi aniqlangan.
Yevropa razvedkasidagi manbalar bu shaxslarning soxta shaxsiyat ostida faoliyat yurituvchi Rossiya maxsus xizmat xodimlari ekanligini iddao qilmoqdalar.
Tadqiqotda “Rosatom”ning maxsus loyihalariga xizmat koʻrsatuvchi “Sabetta” quruq yuk kemasi ham misol sifatida koʻrsatilgan. Maʼlum qilinishicha, kema mart oyida keyinchalik Maliga yuborish uchun Gvineya poytaxti Konakriga taxminan 50 ta zirhli avtomobil va yoqilgʻi tashuvchi mashina yetkazib bergan.
Iddaoga koʻra, harbiy yuk bilan birga, kemada shaxsi yashirilgan toʻrt nafar yoʻlovchi ham boʻlgan.
