Regionda yaşayan 102 imkansız ailəyə ərzaq yardımı verilib.
Bu barədə Modern.az-a məlumat verən Sosial Strateji Tədqiqatlar və Analitik Araşdırmalar İctimai Birliyinin sədri İlqar Hüseynli dildirib ki, COVİD-19 pandemiyasının yaratdığı mənfi təsirlər həm də vətəndaşların maddi imkanlarının məhdudlaşmasına gətirib çıxarıb: “Ərzaq yardımı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə icra olunan “Regionlarda aztəminatlı ailələrə birdəfəlik ərzaq yardımının təşkili” layihəsi çərçivəsində həyata keçirilib. Layihə İmişli rayonunun Kürdmahmudlu, Hacalmuradlı, Soltanmuradlı, Hacırüstəmli və Mürsəlli kəndlərini əhatə edib. Nəzərdə tutulan bölgədə, ümumilikdə 102 aztəminatlı ailəyə birdəfəlik ərzaq yardımı edilib. Ailələr öncədən müvafiq kəndlərdə təşkilatın könüllüləri tərəfindən seçilib. Seçim zamanı Qarabağ müharibəsində şəhidi olan, müharibə zamanı əllilik almış ailələrə üstünlük verilib. Eyni zamanda tənha yaşayan və işsiz olan çoxuşaqlı ailələr ərzaq yardımı ilə təmin olunub”.
