Modern.az

Gələn həftə türkdilli dövlətlərin parlamentariləri Bakıya toplaşacaq

Gələn həftə türkdilli dövlətlərin parlamentariləri Bakıya toplaşacaq

24 Sentyabr 2009, 12:18

Sentyabrın 28-29-da Bakıda Türkdilli Dövlətlərin Parlament Assambleyasının (TDPA) sammiti keçiriləcək.
Milli Məclisin mədəniyyət komitəsinin sədri, Azərbaycan-Türkiyə parlamentlərarası işçi qrupunun rəhbəri Nizami Cəfərov Modern.az-a bildirb ki, bu tədbirdə Assambleyanın təsisçisi olan dörd dövlətin – Azərbaycan, Türkiyə, Qazaxıstan və Qırğızıstanın parlament sədrləri səviyyəsində nümayəndə heyətləri iştirak edəcək. Özbəkistan və Türkmənistan nümayəndə heyətlərinin iştirakı da istisna edilmir.
Sammitdə TDPA-nın katibliyi yaradılacaq və katiblik Bakıda yerləşəcək. Konkret gündəlik isə tədbirin ilk iclasında müəyyənləşəcək.
N.Cəfərov onu da deyib ki, TDPA-ya digər türk dövlətlərinin, daha doğrusu, Rusiyanın tərkibində olan türkdilli muxtar respublikaların, o cümlədən qaqauzların, krım tatarlarının, uyğurların parlament təmsilçilərinin cəlb edilməsi mümkündür.
Komitə sədrinin sözlərinə görə, TDPA təsis edilərkən bu məsələ də diqqət mərkəzində olub. Yəni, ilk mərhələdə sırf müstəqil dövlətlər təmsil olunur, sonrakı mərhələdə isə, əlbəttə, Tatarıstan, Başqırdıstan, Yakutiya və digər türkdilli respublikalar təmsil oluna bilərlər. Çünki onların da parlamentləri, qanunvericilik orqanları mövcuddur.
N.Cəfərov türk dövlətlərinin ortaq televiziyasının yaradılması məsələsinə də aydınlıq gətirib. O deyib ki, hazırda “TRT-Avaz”, o cümlədən “TRT-Türk” kanalları müəyyən işlər görürlər. Ancaq ortaq televiziya odur ki, o, mütləq bir şəkildə bütün türk xalqlarının televiziya maraqları səviyyəsində olsun və bütün türk dünyasının televiziya siyasəti kimi ortaya çıxsın. Burada da əsas yükü hələlik ən münasib olan Parlament Assambleyası öz çiyninə götürə bilər. Yəni, bu məsələyə də TDPA-nın Bakı sammitində baxıla bilər.

 

Telegram
Hadisələri anında izləyin!
Keçid et
Ukrayna ordusu dəhşət saçdı: Rusiya ərazisi vuruldu