“Xırdalan şəhərində Misirin devrilmiş lideri Hüsnü Mübarəkin abidəsinin götürülməsi artıq dövrün tələbi idi”. Bu sözləri Modern.az-a açıqlamasında Abşeron rayon İcra Hakimiyyəti başçısının müavini Zakir Həsənov deyib. O həmçinin qeyd edib ki, parkdan götürülmüş heykəl təhlükəsiz yerdə saxlanılır. “Abidənin sonrakı taleyi isə hələki məlum deyil. Heykəlin yerində isə Misirin keçmiş adət-ənənələrinə uyğun abidə qoyulub”.
Qeyd edək ki, Hüsnü Mübarəkin abidəsi ötən gecə saat 00:39 radələrində götürülüb. Parkda yalnız devrilmiş liderin heykəli götürülüb və başqa heç nəyə toxunulmayıb.
Xatırladaq ki, 2007-ci ilin dekabrında Xırdalanda istifadəyə verilən parkda Hüsnü Mübarəkin abidəsi ilə yanaşı, həmçinin qədim Misir abidələrinin surətləri də ucaldılıb.
Aytən ƏLİYEVA
