Nazir müşavirə keçiribYanvarın 18-də İsmayıllı rayonunda əmək və əhalinin sosial müdafiəsi naziri Fizuli Ələkbərovun sədrliyi ilə nazirliyin aztəminatlı vətəndaşların rifah halının yüksəldilməsi, həmçinin 20 Yanvar əlilləri və şəhid ailələrinin sosial müdafiəsinin gücləndirilməsi sahəsində görülən işlərin və qarşıda duran vəzifələrin müzakirəsinə həsr olunmuş zona müşavirəsi keçirilib.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən Modern.az-a bildirilib ki, nazir Fizuli Ələkbərov müşavirədə sosial proqramların icrası işlərinin davam etdirildiyini, ünvanlı sosial yardım alan ailələrin sayının 120 min, hər bir ailəyə düşən yardımın orta aylıq məbləği 106 manat təşkil etdiyini söyləyib.
“2011-ci il sosial sahədə bir sıra yeni proqramların işə salınması ilə əlamətdar olmuşdur. Yəni ötən il aztəminatlı ailələrin öz potensial imkanlarından istifadə etməklə gəlirlərini artırmalarına şərait yaradılması üçün Birdəfəlik sosial yardım – Özünədəstək proqramı hazırlanmışdır. Ölkə rəhbərinin sərhədyanı bölgələrin əhalisinə göstərdiyi diqqət və qayğıya uyğun olaraq, ötən ilin martında Tovuz rayonunun Ermənistanla həmsərhəd Vahidli kəndində sınaq işlərinə başlanılan bu layihənin cari ildən bütün ölkədə icrası planlaşdırılır. Proqramda iştirak edən ailə artıq ünvanlı yardım almayacaq və sosial reabilitasiya olunaraq yoxsulluq həddindən çıxacaqdır.
Eyni zamanda ötən il vətəndaşlarına xidmətin keyfiyyətcə yüksəldilməsi, onlara dövlət təminatlarından yararlanmaq məqsədilə alternativ müraciət imkanlarının yaradılması, həmçinin ünvanlı yardımların təyinatı işində şəffaflığın artırılması, bu sahədə məmur-vətəndaş münasibətlərinin minimuma endirilməsi, qərar qəbul etmə prosesində subyektiv amillərin aradan qaldırılması məqsədilə ünvanlı sosial yardım üçün alternativ müraciət mexanizmlərinin tətbiqinə başlanılmışdır. İlkin olaraq pilot layihə kimi Cəlilabad və Balakən rayonlarında sınaqdan keçirilməsinə başlanılan bu sistem cari ildə digər rayon və şəhərlərdə də tətbiq olunacaqdır”-deyə nazir qeyd edib.
Bildirilib ki, Nazirlik tərəfindən əhaliyə göstəriləcək elektron xidmətlərin təşkili istiqamətində müəyyən işlər görülüb, Nazirliyin fəaliyyət istiqamətləri üzrə təşkil edilməsi nəzərdə tutulan elektron xidmət növlərinin siyahısı müəyyənləşdirilib. Elektron xidmətlər nəticə etibarilə vətəndaşların Nazirliyin fəaliyyət dairəsinə aid məsələlərlə əlaqədar birbaşa müraciət və xidmətlərdən yararlanmaq imkanlarının xeyli artmasına səbəb olacaq.
Müşavirədə qeyd olunub ki, görülən işlərdə şəffaflığın artırılması məqsədilə ötən il nazirlikdə vətəndaş cəmiyyətlərinin təmsil olunduğu İctimai Şura yaradılıb ki, bütün sosial müdafiə tədbirlərinin təşkilində, eləcə də Özünədəstək layihəsinə cəlb olunan ailələrin seçilməsində həmin Şuranın üzvləri iştirak edirlər.
2011-ci ildə nazirliyin əsas diqqət yetirdiyi məsələlərdən biri də vətəndaşların qəbulu və onların öz iştirakı ilə müraciətlərinə yerində və obyektiv baxılması olub. Nazir və nazirliyin digər rəhbər şəxsləri tərəfindən müxtəlif şəhər və rayonlarında ümumilikdə 560 nəfərdən artıq vətəndaş qəbul edilərək, onların müraciətləri yerində araşdırılmış, konkret tədbirlər görülüb. Bu işlər də nazirlikdə yaradılan İctimai Şuranın üzvlərinin fəal iştirakı ilə həyata keçirilib. Müşavirədə əhalinin sosial müdafiəsi sahgəsində həyata keçirilən tədbirlər, cari ildə görüləcək işlər ətraflı müzakirə olunub.
Tədbirdə 20 Yanvar faciəsinin 22-ci ildönümünün yaxınlaşdığını qeyd edən nazir Fizuli Ələkbərov bildirib ki, 20 Yanvar əlillərinin və şəhid ailələrinin sosial müdafiəsinin gücləndirilməsi, problemlərinin həllinə hərtərəfli kömək göstərilməsi qarşıda duran əsas vəzifələrdən biridir.
Qeyd olunub ki, Əmək və Əhalinin Sosial Müdafiəsi Nazirliyi 20 Yanvar Cəmiyyəti və 20 Yanvar Fondu ilə birlikdə müvafiq tədbirlər görüb və 20 Yanvar faciəsinin 22-ci ildönümü ilə əlaqədar nazirlik tərəfindən 127 şəhid ailəsinin və 328 nəfər əlilin hər birinə 50 manat məbləğində birdəfəlik maddi yardım göstərilməsi məqsədilə vəsait ayrılıb.
«20 Yanvar şəhidinin ailəsi üçün Azərbaycan Respublikası Prezidentinin təqaüdünün təsis edilməsi haqqında» Azərbaycan Respublikası Prezidentinin 2006-cı il 19 yanvar tarixli Fərmanı ilə «20 Yanvar şəhidi» fəxri adı almış şəxslərin ailə üzvlərinə ayda 300 manat məbləğində Prezident təqaüdü təyin olunub. Eyni zamanda, Azərbaycan Prezidentinin 19 yanvar 2011-ci il tarixli, 370 №-li Fərmanına əsasən, 1990-cı ilin 20 Yanvar hadisələri ilə əlaqədar I qrup əlillərə 150 manat, II qrup əlillərə 130 manat, III qrup əlillərə 100 manat məbləğində Azərbaycan Respublikası Prezidentinin aylıq təqaüdü təsis edilib.
Hər il 20 Yanvar faciəsinin ildönümündə nazirlikdə 20 Yanvar şəhidlərinin ailələri və əlillərlə görüş keçirilir və onlara birdəfəlik maddi yardımlar verilir. 20 Yanvar əlilləri və şəhid ailələrinin mənzil-məişət şəraitinin yaxşılaşdırılması da diqqət mərkəzindədir və Əmək və Əhalinin Sosial Müdafiəsi Nazirliyi tərəfindən indiyədək 51 nəfər şəhid ailəsi və 20 Yanvar əlili mənzillə, 50 nəfər əlil isə minik avtomaşını ilə təmin edilib.
Bununla yanaşı, 7 nəfər 20 Yanvar əlilinin respublikadan kənarda və respublika daxilində müalicəsinə müvafiq köməklik göstərilib, həmçinin Nazirlikdə fəaliyyət göstərən komissiyanın qərarı ilə 85 nəfər 20 Yanvar əlilinə birdəfəlik maddi yardım verilib. Son üç ildə bu təbəqədən olan 25 nəfər əlil vətəndaşın yay mövsümündə Nabran istirahət zonasında dövlət hesabına istirahəti təşkil edilib.
Tədbir çərçivəsində əlil ictimai birliklərinin rəhbərləri ilə nazirliyin məsul şəxsləri arasında görüş keçirilib. Görüşdə əlillər, o cümlədən 20 Yanvar əlilləri və şəhid ailələri ilə bağlı görülən işlər və bu sahədə qarşıda duran vəzifələr barədə fikir mübadiləsi aparılıb.
Modern.az
