“Ulu Tanrı! Min illərdir ölənlə ölüb, doğulanlarla doğuluram! Yazdıqlarım daşlarda qalıb! Necəydik elə də varıq! Heç nə dəyişməyib! Yaxşılıq tərk eləyir bizi. Yaxşı ruhlar bacalarımızdan gen düşür! Özləriylə yaxşı nə var aparırlar!.. Bilsinlər ki, heç nə sorğusuz –sualsız qalmır. Hər şeyin cavabı soruşulur! Yazacam! Bilsinlər ki, Gündoğandan Günbatana uzanan yurdlarımız qədərində qaldı. İtirdiklərimiz o qədər çox olub ki, Yer bizi götürməyəcək. Yazanlarımız yazdı, çalıb oxuyanlarımız çalıb oxudu, yenə eşitmədik! Nədəndi dədə?! Qarın qardaşdan irəli olub. O qədər çəpər tikdik ki, Vətən çəpər içi qədər daraldı. Hamı ev tikir, Vətəni tikib quran yoxdur. Mən içimə ağlayıram dədə! Mənə kömək edə bilərsən? Satqınlarımız güclü çıxdı. Vətəni satdılar. Sata-sata gedirik! Mənə kömək edə bilərsən dədə? Çağır böyüklərimizi, böyük ruhlarımızı çağır...”
Bu sözləri ulu türkün ulu oğlu Güntəkin daş kitabələrə yazmışdı. Gör bir nə qədər zaman keçib...
***********
“Alimlərin araşdırmasına görə, dünyanın ən xoşbəxt insanları Böyük Britaniyada yaşayırlar” - bu məlumat saytların birində gözümə dəydi.
Görəsən britaniyalıları xoşbəxt edən nədir ki?
Niyə bizim insanlar haqqında belə məlumatlar yazmırlar? Görəsən bizim insanlar nə vaxtsa xoşbəxt olubmu? Bu sualın cavabını 80 yaşlı anamdan soruşdum. Bilirsiniz cavabı nə oldu?!
“Sovetin vaxtında xoşbəxt idik. Bağçalar havayı, təhsil havayı, həkimlər havayı … dünyanın hər yerinə gedə bilirdik, heç pasportumuza da baxmırdılar…”.
Mənim 80 yaşlı anam üçün dövlətdən aldığı pensiya ilə tək yaşayarsa, ən azı ya qonşunun ümidinə qalacaq, ya da çörək tapanda ət tapmayacaq, ət tapanda soğan… Çünki 150 manat pensiya ilə 1 insanın normal yaşaması çox çətindir. Belə insan yaşamır ki, ölməməkçün nəfəs alır. Çox heyif, çox heyif ki, bizim yaşlılarımız tez qoçalırlar, Amerikanın, avropanın qocaları kimi, aldıqları qocalıq pensiyaları ilə dünya səyahətinə çıxmırlar. Olsa–olsa, əgər işbaz, bir az diri qohumları, övladları olsa, sanatoriyaya göndəriş tapıb, yerləşdirilirlər. Bizim kəndlərin qoçalarının əksəriyyəti heç sanatoriyanın nə olduundan xəbərləri də yoxdur. Hər zaman işlədi, zəhmər çəkdi, övlad böyütdü, oxutdu, guya ki, arzularına çatdı… əksər insanlarımız… bu sətirlər əslində post sovet dövlətində yaşayan insanlarımızın əksəriyyətinə aiddir. Çünki əvvəlcə sağlamlıqlarını sovetlər birliyinə ucuz satıb, bahalı dərdlər aldılar. Ancaq Sovetin dövründə az olan hüquqlarının bərbası üçün işləri düzəlməyəndə, şikayətlərinə baxılmayanda ya Leninin qəbrinə məktub yollayar, ya da Sov.İKP-yə ( Sovet İttifaqı Kommunist Partiyası) ərizə yazıb, ən azı sanatoriya problemlərini, məhkəmədə pozulan hüquqlarını bərpa edə bilirdilər. O zamanın insanının indiki insanlardan bir üstün cəhəti var idi: məmurlar özündən yuxarıdakı məmurdan qorxurdu, həya edirdi, ehtiyat edirdi…
Buna görə də aşağılarda pozulan hüquqlarının bərpasını insanlar yuxarıda tapa bilirdilər.
Bəs bizə nə oldu?
Biz indi Rusiya imperializmindən asılı olmayan gözəl və azad bir dövlət qurmuşuq. Bu dövlətin qurulması üçün düşünmədən hər kəs canından keçirdi, hər kəs “Azadlıq” deyə meydanlara axışırdı, gedirdilər ki, uzaqdakı gələn işıqdan pay alsınlar, hər kəs öz işığı ilə AZAD AZƏRBAYCAN yaratmaq arzusunda idi. Şükürlər olsun ki, o Azərbaycanı yaratdıq. Ancaq o meydanlara çıxanların, azadlığımız üçün qan tökənlərin əksəriyyətinin axırı necə oldu????????????
Biz niyə belə unutqanıq?
Biz niyə əl açmağı öyrəndik?
Biz niyə yalandan əl çalmaq adətini unutmadıq?
Biz niyə qadınlarımızı Türkiyəyə, Dubaya “qazanc” dalınca göndərməyi öyrəndik… Axı arvad qazancının bərəkəti olmur.
Biz niyə belə olduq?
Hərdən fikirləşirəm ki, bütün başımıza gələnlərin günahkarı neftimizdir. Allah da bu qara neməti ən çox müsəlman ölkələrinə verdi ki, bəlaları çox olsun. Harda neft varsa orda qan-qada, müharibə, od-alov… İnsanlarının yarısı tam varlı, yarısı isə tam kasıb… tərs mütənasiblik, gecə və gündüz misallı … bəlkə heç müsəlman olmasaydıq, başımız bu qədər bəlalar çəkməzdi… Odeyyyyyyy…. Böyük Britaniyalılar… yazırlar ki, ən xoşbəxt adamlardır. Onların nefti yoxdur, təkcə neft şirkətləri var. Hətta bizim ölkədə işləyən britaniyalılar da bizim vətəndaşlardan daha çox aylıq əmək haqqı alırlar. Adamların olduğu kimi, gərək xalqların da bəxti gətirsin. Mən istəyirəm ki, neftimizin gəlirindən insanlarımız o qədər bəhrələnsin ki, siyasi qarşıdurmalara, boş-boş müxalifətçiliyə vaxtları qalmasın. Hər kəs işinin məsuliyyəti, ailəsinin məsuliyyəti, dövlətinin əmin-amanlığına xidmət etmək üçün düşünsün!!!
Bizimki, elə əvvəlindən belə gəlib…
Lap çoxdankı tarixlərimizdə öz azərbaycanlılarımız vətənimizi xanlıqlara bölüb, yola getmədilər, sonra, rusların müstəmləkəsinə keçdik, sonra Stalin doğru deyən dillərimizi kəsdi… onsuz da dünya heç vaxt ədalətli olmayıb ki, doğru deyən dilləri hər zaman ya kəsiblər, ya da ki, insanların beynində, ruhunda zəlzələ yaradanları, oyadanları ya qurbətə, ya qəbirə, ya da Sibirə göndəriblər.Bütün bunlardan sonra da belə qənaətə gəlmək olur ki: Nəsimidən sonra “Həqq məndədir!” deməyin nə mənası var?!
Bir dəfə Qazaxıstanın Astana şəhərində bir neft forumu keçirilirdi. Orada Azərbaycanı neft gəlirlərini şəffaf açıb göstərən bir ölkə kimi misal çəkdilər və tədbir iştirakçılarına tövsiyə olundu ki, bu təcrübəni yaymaq lazımdır. Çox sevindim. Qürür verici bir məqam idi. Biz beləyik, hamımız beləyik harada ucalarda dalğalanan bayrağımızı görsə ona sevinərik, haradan xoş xəbərimiz gəlsə bayram edərik. Biz dar gündə də, şadyanalığımızda da birləşməyi bacarırıq. Mən inanıram ki, çox vaxt hətta bu qədər əzilməklərinə, ümidlə döydükləri qapılardan əliboş qayıtmalarına baxmayarq, bizim o döyüşçülərimiz, o veteranlarımız, əmr olunsa, günü sabah yenə səf-səfə dayanıb, Vətən torpaqlarını azad edəcəklər.
**********
At muraddır deyirlər. Bu il At ilidir. İstəyirəm ki, Azərbaycan vətəndaşı bu ildən başlayaraq cibi dolu yaşasın, qocaları Avropanın, Amerikanın qocaları kimi Vətənimizin adına layiq olan pensiya ala bilsinlər ki, onlar da bir dəfə KRUİZ səfərinə çıxsınlar.
İstəyirəm ki, İmran Cəfərzadə kimi ayağı bədbəxt hadisə nəticəsində kəsilən insan əlacsızlıqdan prezidentə müraciət etməsin, onun qəzasında günahkar olan məmur, oliqarx president bu işə qarışmamış, özü həmin şəxsin qayğısına qalsın. İstəyirəm ki, Zaur Həsənov kimi kimsə canından bezib, özünü yandırmasın, və yalnız prezident işə qarışandan sonra, məmur qorxuya düşüb, zərəçəkənin ailəsinə yardım etməyi özünə “borc” bilsin. Bir dəfə də yazmışdım, niyə bizim məmurlar, oliqarx nazirlərimizin bəziləri ədaləti prezident barmaq silkələyəndən sonra görməli və ya təmin etməlidirlər?! O da bir müddət, sonra yenə unudurlar. Niyə ölkənin çiçəklənməsi, inkişafı üçün , ölkə insanının rifaı üçün görülən işləri heçə endirirsiniz? Olmazmı ki, hər biriniz işinizdə namuslu, vicdanlı olasınız?! Yəni bu belə çətindir?
Axı elmin-texnikanın son nailiyyətləri, yenilikləri ilə açılan bütün xəstəxanalar insanlarımıza havayı xidmət göstrməli olduğu halda, o qapılardan ümidsiz qayıtmalıdırlar?! Mən istəyirəm ki, həkimlərimizin aylıq əmək haqqları o qədər olsun ki, onlar xəstələrin əlinə baxmasınlar. Vicdanlarını əyinlərinə geydikləri ağ xalatları kimi təmiz saxlasınlar. Və insanlarımız haqqları çatan qədər onlara Konstitusiyamızla verilən hüquqlardan istifadə etsinlər. Xəstəliyinin əlacı xarici dövlətlərdə olanlar dərdlərinin əlacını elə öz AZAD VƏTƏNİMİZdə tapsınlar.
Mən istəyirəm ki, bu At ilində hakimlərimiz gözü bağlı Femida misallı olsunlar, sifarişli hökümlər çıxarmasınlar. Tarixi şəxsiyyət Heydər Əliyevin dediyi bir gözəl söz var idi: “QOY ƏSALƏT ZƏFƏR” çalsın.
Mən istəyirəm ki, bu il bizi gözləyən parlament seçkilərində deputat yerlərinə millət vəkillərini puluna, dayısına, qohumuna görə seçməsinlər. Alqı-satqı olmasın!!!Mən istəyirəm ki, çox az sayda deputatlarımız kimi, bütün deputatlarımız xalqın, millətin vəkili olsunlar. Əvvəl onlara inanan insanların güzəranını düzəltsinlər, sonra bizim Azərbaycan adamı xəcalətli qalan deyil, günü - güzəranı yaxşı oldumu, ən şirin tikəsini ona yaxşılıq edənlə böləcək.
Mən istəyirəm ki, Sovet vaxtında yaşayan kişilərimiz kimi kişilik nümayiş etdirsin erkəklər. Qadın malına, qadın puluna göz tikməsinlər!!!
Mən istəyirəm ki, insanlarımız anamın darıxdığı Sovet illərindəki kimi mərhəmətli olsunlar, qonşu-qonşusunu tanısın, bir evin işığı o biri evə düşsün!!!
Bu işıqların cəmindən Vətənimizin uzaqlara düşən İŞIĞI da çoxalar!!!
Mən istəyirəm ki, açılan yeni iş yerlərində Azərbaycan adamı kiminsə zəngi olmadan, kimsəyə güvənmədən, öz ağlına , peşəsinə güvənərək işləsin, iş axtardığı qapılardan geri qayıtmasın. Mən istəyirəm ki, kəndlərdə, rayonlarda işsizlik probleminə son qoyulsun!!! Onda insanlarımızın SABAHA—İÇIQLI SABAHA inamları artar, onda DÖVLƏTİMİZ daha GÜCLÜ olar!!!
Mən istəyirəm ki, bu AT ilində qəhrəmanlarımız unudulmasın, onların şəkilləri , portretləri bütün məktəblərin, təhsil ocaqlarının qarşısında, “Azərsun”, “Final”, “PakDAD” reklamlarının yerində asılsın. Mübariz və Fəridi dəfn edərkən Ali Baş Komandanın dediyi “Azərbaycanın müstəqilliyi, Qarabağ savaşı uğrunda canlarını fəda edənlər unudulmamalıdır, onların həyatları nümunə kimi təbliğ olunmalıdır”. – tezisi unudulmasın. Bunun üçün televiziyalarda 1-2 ədəbsiz şou proqramlar azalsa, şəhidlərimizin, qəhrəmanlarımızın da təbliğinə pəncərə tapılar.
Mən istəyirəm ki, böyük şəhərlərimizdə məzar üçün nəzərdə tutulan torpaqları ölü yiyəsinə satmasınlar, ölüdən pul almasınlar. Vətənin içərisində dəllalarla torpaq bazarlığı yapmaqdansa, dünyanın gözü qarşısında MƏZARLARI erməni tapdağı altında qalan torpaqlarımızın bazarlaığını yapmaq üçün birləşək, yumruğu bir yerə vursunlar. Bunu üçün , ən əvvəl ekranda bir iki dəfə mahnı oxuyan silikonlu müğənnilərə 100-200 min dollar və daha baha qiymətə alınan maşınlara xərclədiklərini, güclü dövlətlərin əli ilə tapdanan ədalətimizi növbəli şəkildə EVRONEWS , BBC və söz deyə biləcək informasiya vasitələrində dünyaya car çəkmək üçün , torpaqlarımızın qaytarılması üçün xərcləsinlər. Necə ki, ermənilər hər il aprel ayının 24-də qulağı kəsik Andronik və qondarma erməni soyqırımını işıqlandırırlar. Bu təbliğat işi güclü olan, varlı olan hər bir azərbaycanlının vicdan məsələsi olsun!!!
Elə yaşayaq, bu ili elə başa vuraq ki, ULU RUHLARI özümüzdən incik salmayaq. Ruhların divanı yaman olur!!! Tanrı o gündən saxlasın... O ruhların içərisində ulu türklərin, babalarımızın, şəhidlərimizin ruhları da var...
